STEAS bölməsinin rəhbəriSTAR neft emalı zavodunun planları haqqında

Bakı/12.05.23/Turan: SOCAR Turkiye Enerji (SOCAR-ın Türkiyədəki törəmə şirkəti, STEAS) 2023-cü ildə STAR neft emalı zavodunun gücünü ildə 11,3 milyon tondan 12 milyon tona çatdırmağı planlaşdırır, bu barədə SOCAR Turkey Refining and Petrochemical Business Unit-in (SOCAR Turkiye Enerji-nin bölməsi - STEAS) rəhbəri Anar Məmmədov İzmirdə mətbuat turu zamanı azərbaycanlı jurnalistlərə bildirib.

Hazırda zavod Türkiyənin əsas neft məhsulları növlərinə olan tələbatının 20-25%-ni təmin edir, zavodda istehsal olunan neft məhsullarının 55-60 faizini dizel yanacağı təşkil edir.

Neft emalı zavodunun fəaliyyəti Petkim neft-kimya kompleksini xammal - nafta ilə təmin etməyə imkan verir.

“Petkim” isə bu neft emalı zavodunun səhmdarıdır.

“Bizim üçün prioritet Türkiyə bazarına neft məhsullarının tədarüküdür. Ancaq bəzən daha yaxşı logistikaya görə dizel və aviasiya kerosinini ixrac etmək daha yaxşıdır. Biz vaxtaşırı həm onlarla, həm də kimya sənayesi üçün xammalla Aralıq dənizi bazarına çıxırıq”, - Məmmədov bildirib. 

SOCAR 2018-ci il oktyabrın 19-da istifadəyə verilmiş STAR neft emalı zavodunun tikintisinə 7 milyard dollara yaxın investisiya yatırıb, zavod “Azeri Light”, “Kərkük” və “Urals” kimi neft növlərinin, ümumilikdə 20-dən çox növ neftin emalı üçün nəzərdə tutulub.

Eyni zamanda, zavodun dizaynına görə emal üçün ən uyğun ağır neft növləri, məsələn, Qazaxıstan, Afrika, Qara dəniz regionu neftidir.

Qeyd edək ki, STAR neft emalı zavodu ildə 1,6 milyon ton nafta, 1,6 milyon ton reaktiv  yanacaq, çox aşağı kükürdlü 4,8 milyon ton dizel yanacağı, 700 min ton neft koksu, 420 min ton qarışıq ksilen, 480 min ton reformat və 160 min ton kükürd istehsalı üçün nəzərdə tutulub. 

Aprel ayında STEAS səhmdarları Petkim-in neft emalı zavodunda payının 18 faizdən 12 faizə endirilməsi barədə qərar qəbul ediblər.

"Turan"ın belə qərarın səbəbi ilə bağlı sualını cavablandıran Məmmədov bunu belə izah edib: “Hər iki obyekt fərqli marja ilə işləyir və bu, səhmdarlar üçün yaxşı vəziyyət deyil. Neft emalı zavodu və “Petkim” əməliyyat və səhmdarların işi baxımından bir-birinə inteqrasiya olunduğundan, kapital qoyuluşlarını qorumaq və beynəlxalq kredit öhdəliklərini təmin etmək üçün “Petkim”in neft emalı zavodunda payının azaldılması qərara alınıb. Bu, hər iki obyektin işini optimallaşdıracaq. Zamanla payların dəyişəcəyini istisna etmirəm. “Petkim”in sabit likvidliyi və layihələrin xərcini yüksək səviyyədə çıxarması ilə səhm nəzarət paketi SOCAR-a məxsus olan bu şirkət öz payını artıra bilər”.

NEZ-ə Rusiya Federasiyasından neftin tədarük edilib-edilməməsi ilə bağlı suala Məmmədov belə cavab verib: “Biz bütün beynəlxalq sanksiyalara (Rusiyaya qarşı - əlavə redaktor) əməl edirik... ümumiyyətlə, müxtəlif neftləri almaq üçün kifayət qədər imkanımız var. Çalışırıq Azərbaycan neftini almayaq, çünki o bahalı və yüngüldür. Biz açıq bazarda əsasən ağır neft alırıq”. --0--