Su üçün növbəti kredit

 Azərbaycan regionlarda su təchizatı və kanalizasiya sistemlərini yaxşılaşdırmaq üçün $150 mln əlavə kredit götürəcək. Dünya Bankının məlumatında deyilir ki, bu barədə qərar Direktorlar Şurasında qəbul edilib.

Krediti BeynəlxalqYenidənqurma və İnkişaf Bankı ayırır, Azərbaycan hökumətinin payı $83 mln-dur.  DB-nin Cənubi Qafqaz üzrə direktoru Henri Keralinin sözlərinə görə, göstərilən əlavə maliyyələşdirmə Azərbaycan hökumətinin ölkənin regionlarında reallaşdırdığı su təchizatının yaxşılaşdırılması üzrə kompleks proqramı tamamlayacaq. Etibarlı su təminatı və kanalizasiya kimi ictimai infrastrukturun baza xidmətlərinin təqdim edilməsi kənd əhalisinin həyat səviyyəsinə əhəmiyyətli təsirə malik olacaq, həmçinin yoxsulluğun azaldılması üzrə DB qrupunun hədəflərinə nail olmağa və ümumi çiçəklənməyə imkan yaradacaq.

Vəsait hesabına Siyəzən, Şabran, Ağsu, İsmayıllı, Lerik, Yardımlı, Masallı və Cəlilabad rayonlarında su təchizatı yaxşılaşdırılacaq. Layihə 3 illikdir və 300 min nəfərin həyat səviyyəsini yaxşılaşdıracaq.

Əvvəllər məlumat verildiyi kimi, 2008-ci ildə DB Azərbaycana bu məqsədlə $260 mln kredit ayırıb. Azərbaycan hökuməti bu məqsədlə $150 mln ayırır.

Azərbaycan 1992-ci ildən  Dünya Bankının üzvüdür. Bu dövrdə bank Azərbaycanda 54 layihəyə $3,3 mlrd ayırıb. Hazırda 17 layihə üzrə işlər davam edir. --17D—