Şüşə idxal edən sahibkar gömrüklə inhisarçı arasında qalıb

“Deyirlər inhisarçılıq götürülüb, vasitəsi brokerlər ortadan qaldırılıb. Bəs o zaman Əbülfəz Məlikov kimdir ki, mənim gətirdiyim mala sahib çıxmaq istəyir?”. Turan İA ilə söhbətində 2015-ci ildən Azərbaycana şüşə idxalı ilə məşğul olan Səxavət Mustafayev Dövlət Gömrük Komitəsində incidildiyini deyir.

Sahibkar deyir ki, dekabrın 21-də Rusiya Federasiyasından Biləcəri stansiyasına gəlmiş bir vaqon şüşəni (6673 kv m) bu günədək qəbul edə bilmir. “Dekabrın 29-da  inhisarçı Əbülfəz Məlikovla separat danışığa getməli oldum.  Sumqayıt Baş Gömrük İdarəsi onun razılığından sonra gömrük rəsmiləşdirməsini apardı”.

Səxavət Mustafayevin sözlərinə görə, gömrük ödəmələrini aparıb və mal onun adına rəsmiləşib. “Amma indi Əbülfəz Məlikov tələb edir ki, malı başqasına sata bilmərəm və ona, özü də mayasına təhvil verməliyəm. Onların məqsədi budur ki, mal bazara bir əllə girsin və qiymətlər aşağı dşməsin”. Sahibkar belə deyir.

Sahibkar Sumqayıt Baş Gömrük İdarəsinin Dəmir yolu Gömrük Postundan yükün boşaldılaraq ona təhvil verilməsini tələb edir. Amma postun rəisi ona deyir ki, “bunu etsə, vəzifəsindən kənarlaşdırılacaq”. Yükün dəmir yolu stansiyasında qalması isə sahibkara hər gün 145 manat ziyan vurur.

Səxavət Mustafayev deyir ki, Dekabrın 21-dən indiyəkək DGK-ya, hüquq-mühafizə orqanlarına, Prezident Administrasiyasına etdiyim müraciətlərə isə heç bir reaksiya verilmir. Müraciətlərinin hələ ki bir nəticəsi var: ona müxtəlif təzyiqlər edilməyə başlayıb. Lakin o, mövqeyindən dönməyəcəyini bildirir. “Bu vaxta qədər gətirdiyim şüşə lövhələri öz adıma da, başqa şəxslərin adlarına da rəsmiləşdrmişəm. Amma prezident İlham Əliyev gömrükdə qayda-qanun yaradılmasını istədiyini söyləyir. Mən də hər şeyin qanuni olmasını tələb edirəm”.

Qeyd edək ki, barəsində söhbət gedən Əbülfəz Məlikovun gömrük brokeri şirkətlərindən birinə rəhbərlik etdiyi, ölkəyə gətirilən müxtəlif malların onun vasitəsi olmadan gömrük orqanlarında qəbul edilmədiyi bildirilir.—08B--