TAP-ın tikintisində istifadə ediləcək borular Albaniyaya çatdırılıb

Trans-Adriatik Boru Kəmərinin (TAP) Albaniya hissəsinin tikintisi üçün nəzərdə tutulan borular Albaniyaya çatdırılıb, deyə ТАР konsorsiumu məlumat verir.

Bununla bağlı Durres limanı yaxınlığında Albaniyanın baş naziri Edi Rama, energetika və sənaye naziri Damian Qjiknuri, yerli hakimiyyət nümayəndələri, TAP-ın inşasını həyata keçirəcək şirkətlər, Albaniya şirkətləri və digər səhmdarların iştirakı ilə mərasim keçirilib.

Baş nazir Edi Rama, energetika və sənaye naziri Damian Qjiknuri TAP-ın regionun ən vacib enerji layihələrindən biri kimi ümumən Albaniya və bu ölkənin Avropa enerji bazarında oyunçu kimi yer tutmasında əhəmiyyətini xüsusi vurğulayıblar. Onlar qeyd ediblər ki, TAP iqtisadi inkişafın təşviqinə, Albaniyada yeni imkanların yaradılmasına və ölkənin enerji infrastrukturunun inkişafına müsbət təsir edəcək.

TAP-ın Albaniya üzrə ölkə meneceri Şolqin Bozqo deyib: “Boru kəmərinin Albaniya hissəsinin tikintisini səbrsizliklə gözləyirik. TAP çox vacib layihədir və onun uğurla tamamlanması etibarlı tərəfdaşların effektli əməkdaşlığının nəticəsi olacaq. Bu layihə tikinti mərhələsində və uzun müddət Albaniyaya əhəmiyyətli dərəcədə müsbət təsir edəcək".

Qeyd edək ki, TAP-ın Albaniya hissəsinin tikintisi üçün 18 və 12 metr ölçüdə 13 min borudan istifadə olunacaq. Boruları Almaniyanın Salzgitter Mannesmann International GmbH şirkəti istehsal edib.

Uzunluğu 878 km olan ТАР bor kəməri Türkiyə-Yunanıstan sərhədində TANAP kəməri ilə birləşəcək. ТАР layihəsi "Şahdəniz 2" qazının Aİ ölkələrinə nəqlini nəzərdə tutur. ТАР-ın ilkin buraxılış gücü ildə 10 mlrd kubmetr təşkil edəcək.

ТАР səhmdarları bunlardır: BP - 20%, SOCAR (20%, Snam - 20%, Fluxys - 19%, Enagás - 16%, Axpo - 5%.–12D--