Təsis sənədlərindəki dəyişikliklərin qeydiyyatından yayınanlar iri məbləğdə cərimə olunacaq

Milli Məclis dekabrın 17-də Hüquqi şəxslərin dövlət qeydiyyatı və dövlət reyestri haqqında" qanuna dəyişikliklər edib. Bu, QHT-lərdə mənfi rezonans doğurub. Amma aktda yerli və beynəlxalq QHT-lərlə yanaşı kommersiya hüquqi şəxslərlə bağlı müddəalar əksini tapıb. 

Əlavələrə əsasən, hüquqi şəxslərin, habelə xarici dövlətlərin hüquqi şəxslərinin filial və ya nümayəndəliklərinin təsis sənədlərində edilmiş dəyişikliklər dövlət qeydiyyatından sonra qüvvəyə minir. Hüquqi şəxslər qeydiyyata alınmayan məlumatlarla fəaliyyət göstərər bilməz. Belə hallar müəyyən edildikdə onlar məsuliyyətə cəlb edilir, amma bu, dəyişikliklərin qeydiyyatına mane olmur. 

MM paralel olaraq İnzibati Xətalar Məcəlləsinə də dəyişiklik edib. Əlavə edilən 200-2 maddəyə əsasən, təsis sənədlərində edilmiş dəyişikliklərin və bu qurumlara dair qeydə alınmış faktların sonrakı dəyişikliyinin qeydiyyata alınması üçün qanunvericiliklə müəyyən edilmiş müddətdə və qaydada müvafiq icra hakimiyyəti orqanına müraciət olunmamasına görə vəzifəli şəxslər min manatdan iki min manatadək, hüquqi şəxslər və xarici hüquqi şəxslərin filial və ya nümayəndəlikləri iki min beş yüz manatdan üç min manatadək miqdarda cərimə edilir.

Təsis sənədlərində edilmiş dəyişikliklərin təqdim edilməməsi Azərbaycanda nadir hadisə deyil. “Xətai Tikinti Mexanizasiya”nın təsisçilərindən olan Nizami Aslanbəyov Turan-a bildirib ki, 2010-cu ildə səhmdarların ümumi yığıncağında qərar qəbul edilib ki, nizamnamə kapitalı azaldılsın. Fakt QKDK-da qeydiyyata alınıb. Amma SC-nin İH-i naməlum səbəblərdən nizamnamədə dəyişiklik üçün Vergilər Nazirliyinə müraciət etməyib. Beləliklə, 2 müxtəlif nizamnamə kapitallı “Xətai Tikinti Mexanizasiya” ASC var  – 502 min və 427,5 min manat. 

Qeyd edək ki, «Hüquqi şəxslərin dövlət qeydiyyatı və dövlət reyestri haqqında" qanunun əlavəsi də var və o, adında dəyişilik edilən hüquqi şəxsin, filialın, xarici hüquqi şəxsin möhürünün təhvil verilməsini nəzərdə tutur. Əks təqdirdə dəyişiklik qeydiyyata alınmır. Bundan əlavə, hüquqi şəxslərin dövlət reystrində hüquqi şəxsin yeri və daimi fəaliyyət göstərən orqanı barədə məlumat əksini tapacaq. 08D