Tezliklə ARDNŞ-nin səhmdar olduğu daha bir boru kəməri layihəsi həyata keçiriləcək

Beynəlxalq boru kəməri müəssisəsi “Sarmatiya” Avrasiya neft nəqliyyat dəhlizi (ANND) layihəsinin maliyyələşməsi üçün iyuna kimi ərizə vermək məqsədilə sənədlərin hazırlanmasını başa çatdırmaq istəyir. Bu barədə UNİAN agentliyi “Sarmatiya”nın direktoru Sergey Skripkaya istinadən məlumat verir. Skripka qeyd edib ki, ANND Polşa sahəsinin marşrutu Odessa-Brodı kəmərinin bazasında yaradılacaq və Polşanın 19 ərazi vahidində yerli plana daxil edilib. 

O həmçinin xatırladıb ki, şirkət ekoloji icazə almaq üçün müraciət edib və 2-3 aya onu alacağını düşünür. 

“ Ekoloji icazə alan kimi Aİ-nin layihəni maliyyələşdirməsi sazişi çərçivəsində bütün öhdəlikləri yerinə yetirmiş olacağıq”, - deyə o bildirib. 

Onun sözlərinə görə, layihənin icrasında əsas əngəl ANND üzrə dövlət sazişlərinin olmamasıdır və onu Polşa gecikdirir. Skripka bildirib ki, Ukrayna hakimiyyəti polşalı həmkarlarına boru kəmərinin maliyyələşməsinə işttiraklarını təklif ediblər.

“Sarmatiya”nın baş direktoru deyib ki, layihəyə vəsaiti Ukrayna və Polşa dövlət neft nəqliyyat şirkətləri qoya bilər. Amma Polşa hökuməti və PERN Przyjazn təmsilçiləri ideyanı dəstəkləməyib. 

Skripka bildirib ki, Brodıdan Polşanın neft nəqliyyat sisteminə qədər çatışmayan hissənin tikintisinin qiyməti €455 mln-dur. Polşa sahəsinin qiyməti €280 mln-dan çoxdur. 

Skripka xatırladıb ki, Polşa Aİ-dən layihə üçün €120 mln cəlb edə bilər. Ukrayna isə özü kəmərin tikintisinə €140 mln, nasos stansiyası tikintisi üçün €30 mln tapa bilər. 

“Sarmatiya”nın direktoru deyib ki, boru kəmərinin çatışmayan hissəsi Ukraynada 120 km, Polşada 270 km-dir. 

  Ukrayna hökuməti dəfələrlə kəmərin Qdanska kimi uzadılmasını təklif edib. Amma Polşa tərəfi qeyd edib ki, bunun üçün Xəzərdən xammal tədarükçüləri və istehlakçıları arasında saziş bağlanmalıdır. 2012-ci il oktyabrın əvvəlində energetika naziri Natiq Əliyev bəyan edib ki, kəmər Polşa sərhədinə kimi tikilsə, Azərbaycan onu neftlə doldurmağa hazırdır. 

Skripkanın fikrincə, Brodı-Plotsk kəməri 2015-ci ilin sonu üçün həyata keçirilə bilər. 

“Odessa-Brodı” (uzunluğu 667 km, layihə gücü ildə 14,5 mln ton) 2001-ci ildə tikilib. Onunla Xəzər və Qazaxıstan neftini Türkiyə boğazlarından keçmədən şərqi və mərkəzi Avropa NEZ-lərinə və Qdansk vasitəsilə şimali Avropaya nəql etmək planlaşdırılırdı. 2004-cü ildə neft kəməri dayanıb, sonra revers rejimində (“Cənub” terminalına tərəf) işləyib. Sonra avers rejimində neftin Belarus NEZ-ə nəqli üçün istifadə edilib. 2012-ci ildən dayanıb. 

* ARDNŞ “Sarmatia”da 24,75% paya malikdir.