Ukrayna XİN Ermənistana silah satışını təkzib edir

Ukrayna XİN bir sıra Azərbaycan KİV-lərinin Ermənistana raket satılması haqqında yaydığı məlumatları təxribat adlandırıb. Bu barədə Kiyevdə bugünki brifinqdə XİN-in mətbuat katibi Aleksandr Dikusarov bildirib.

“Bəzi İnternet-resurslarda yer alan məlumatın mənbəyi məlum deyil və bu məlumatlar açıq-aşkar təxribat xarakteri daşıyır”, deyə Dikusarov qeyd edib. 

Bu və ya digər ölkələrlə hərbi-texniki əməkdaşlığın inkişaf etdirilməsi məsələlərində Ukrayna tərəfi BMT, ATƏT çərçivəsində beynəlxalq öhdəliklərinə, habelə milli qanunvericiliyə ciddi şəkildə riayət edir. 

“Ukraynanın ATƏT-də gələcək sədrliyini nəzərə alaraq, rəsmi Kiyev regionda təhlükəsizliyin və sabitliyin möhkəmləndirilməsi üçün səy göstərir və buna davam edəcək”, deyə Dikusarov bildirib. 

Bir müddət əvvəl bir sıra Azərbaycan KİV-ləri Ukrayna Müdafiə Nazirliyinin Baş Kəşfiyyat İdarəsinin rəisi general-mayor Sergey Qmızanın prezident Viktor Yanukoviçə Ermənistana silah satışı ilə bağlı məktubunun mətnini dərc edib.

Məktubda 12 ədəd yaylım atəşli “Smerç” raket sistemlərinin, habelə 50 “İqla” komplekslərinin Ermənistana qanunsuz satışı sxemi əksini tapıb. Məktubda ixracın həyata keçirilməsi üçün Aİ və MDB-də qeydiyyatdan keçmiş saxta firmalardan istifadə etmək təklif olunur. Məktubda həmçinin Ermənistanın artıq müqavilədə nəzərdə tutulan qiymətin 50%-ni ödədiyi deyilir və Azərbaycanın bu barədə öyrənə biləcəyi vurğulanır. -02D-