Yarım ilin iqtisadi statistikası

Dövlət Statistika Komitəsi 2016-cı ilin birinci yarısına aid iqtisadi bilgilərin bir qismini açıqlayıb.

Müəssisələr artır...

Həmin bilgilərə görə, yanvar-iyun aylarında ölkədə 4362 müəssisə, təşkilat yaradılıb. Komitə bu sahədə ötən illə müqayisədə 29,7 faiz artım olduğunu bildirir.

Yeni müəssisə və təşkilatların 63 faizinin Bakıda, 11 faizinin Aran, 7,7 faizinin Abşeron, 4,7 faizinin Lənkəran, 4,5 faizinin Gəncə-Qazax, 3,9 faizinin isə Quba-Xaçmaz iqtisadi rayonlarında yaradıldığı qeyd olunur.

Fəaliyyətini dayandıran fərdi sahibkarlar, təşkilatlar haqda bilgi verilmir...

Qapadılan müəssisə və təşkilatların statistikası açıqlanmır.

Komitənin bilgilərinə görə, yanvar-iyunda fərdi sahibkarlıqla məşğul olmaq istəyənlərin sayında da artım olub. 6 ayda vergi orqanlarında 48 911 fiziki şəxsin qeydiyyatdan keçdiyi bildirilir.

Ötən illə müqayisədə fərdi sahibkarlıq üçün qeydiyyatdan keçənlərin sayındakı artım 30,5 faizdən çox olub.

Fərdi sahibkarlar daha çox Bakıda, Aran, Gəncə-Qazax, Lənkəran, Abşeron, Şəki-Zaqatala və Quba-Xaçmaz iqtisadi rayonlarında qeydiyyata alınıb.

Fəaliyyətini dayandıran fərdi sahibkarlar haqda bilgi verilmir.

Sənaye istehsalında cüzi artım

Statistika Komitəsinin bilgilərinə görə, 6 ayda sənaye istehsalında cüzi olsa da artım müşahidə olunub. Yanvar-iyunda 14,75 milyard manatlıq sənaye məhsulu istehsal edildiyi, bu göstəricinin əvvəlki illə müqayisədə 0,6 faiz çox olduğu bildirilir.

Sənaye məhsulunun 64,6 faizi mədənçıxarma, 28,9 faizi isə emal sektorunda istehsal edilib.

Komitənin bilgilərində deyilir ki, emal sektorunda qida məhsullarının istehsalı 4,5, tütün məmulatlarının istehsalı 17,2 faiz artıb.

İçkilərin istehsalı 8,2, geyim istehsalı 4,2, dəri və dəri məmulatlarının, ayaqqabıların istehsalı 76,4, kimya sənayesi məhsullarının istehsalı 16,1, rezin və plastik kütlə məmulatlarının istehsalı 22,9, tikinti materiallarının istehsalı isə 23,5 faiz azlıb.

Xarici ticarət - ixrac yenə neft-qaz üzərindədir

Xarici ticarət əlaqələrinə gəlincə, Statistika Komitəsi bildirir ki, yanvar-may aylarında azərbaycanlılar dünyanın 155 ölkəsi ilə ticarət əməliyyatları həyata keçiriblər.

Məhsullar 95 ölkəyə ixrac, 145 ölkədən isə idxal edilib.

Yanvar-may aylarında xarici ticarət dövriyyəsinin 8367,5 milyon dollar təşkil etdiyi bildirilir.

İxracın dəyəri 5036,1 milyon, idxalın dəyəri isə 3331,4 milyon dollar olub. Komitəyə görə, müsbət ticarət saldosu 1704,7 milyon dollar təşkil edib.

Həmişəki kimi ticarət dövriyyəsinin ən böyük hissəsi - 41,8 faizi Avropa İttifaqı ölkələri ilə olub. MDB dövlətləri ilə ticarət 12 faiz təşkil edib. 46 faiz dünyanın digər ölkələrinin payına düşür.

İxrac edilmiş məhsulların ümumi dəyərində xam neft, neft məhsulları, təbii qaz əsas yeri tutur.

Sonrakı yerlərdə meyvə-tərəvəz, plastik kütlə, qara metallar və onlardan hazırlanan məmulatlar gəlir.—0--