Yerli mal və xidmət tədarükçülərinə daha yüksək güzəştlər hazırlanıb

İqtisadiyyat və Sənaye Nazirliyinin hazırladığı normativ-hüquqi aktlar layihəsi dövlət satınalmaları zamanı yerli mal və xidmət tədarükçüləri üçün güzəştlərin iki dəfə artırılmasını nəzərdə tutur. Beləliklə, yerli şirkətlər tender satınalmaları zamanı xarici rəqiblərindən daha əlverşli imkana malik olacaqlar.

«Dövlət satınalmaları haqqında» AR Qanununa, eləcə də Nazirlər Kabinetinin 2002-ci il 28 oktyabr tarixli "Güzəştlərin həcmi və tətbiqi Qaydasının, Malların (işlərin və xidmətlərin) qiymətlərində dəyişikliklərin satınalma müqaviləsinə təsirinin hesablanması üsulunun tәsdiq edilməsi və bölünən hissələrin məbləğinin müəyyən edilməsi haqqında" qərarına dəyişikliklər nəzərdə tutulur. Parlament qanuna dəyişikliyi qəbul etsə, yerli şirkətlər istifadə edilən yerli xammal və işçi qüvvəsinin həcmindən asılı olaraq təklif edilən idxal mal və xidmətin qiymətində 10-25% güzəşt əldə edəcəklər.

Hökumət hesab edir ki, güzəştlərin iki dəfə artırılması yerli mal və xidmət istehsalının artmasına imkan yaradacaq. Qeyd edək ki, son 11 ildə yerli mal və xidmət tədarükçülərinə əvvəl qüvvədə olan güzəştlər barədə hesabatlar açıqlanmayıb. 08B