Zəif tələbat fonunda yun istehsalı artır

Qoyunçuluğun inkişafı ilə əlaqədar Azərbaycanda yun istehsalı 2000-ci illə müqayisədə 54% artıb. Amma heyvandarlar satışda çətinlik çəkir. 2013-cü ildə ölkədə 16,8 min ton yuyulmamış yun istehsal olunub. Bu, 2012-ci ildəkindən 400 ton (+2%) çoxdur. Məhsulun çoxu bazarda satılır. Əhali ondan yataq ləvazimatı hazırlayır. Yuyulmamış yunu alan kiçik sexlər onu yuyub ilkin emal edir. Bundan sonra qiymət 0,70-dən 4-8 manata artır. Fermerlər bildirir ki, bəzən yun satılmır və anbarlarda xarab olur.

Sovet dövründə Yevlax Yun Zavodu ildə 10 min ton xammal emal edirdi. Xammalın bir hissəsi müttəfiq respublikalardan daxil olurdu. Zavod böyük bir zəncirin həlqəsi idi: yuyulan yun Rusiyaya göndərilirdi. İttifaq dağılandan sonra kooperasiya pozuldu, deyə Kənd Təsərrüfatı Nazirliyi hеyvаndаrlıq məhsullаrının istеhsаlı, еmаlı, dаmаzlıq işi və оtlаqlаr şöbəsinin rəis müavini Fərhad Eminov   Turan-a bildirib. Onun sözlərinə görə, dövlət yun istehsalı, emalı və son məhsul istehsalı artımında naraqlıdır. Kiçik sexlərin təşkili üçün güzəştli kredit verilə bilər. Amma özəl sektor buna maraq göstərmir.

2000-ci illərin əvvəllərində Yevlax Yun Zavodu SC-yə çevrilib. Səhm nəzarət paketi hərracda satılıb. Amma zavodun işi bərpa edilməyib. «Çin daha ucuz sintetik lif təklif etdikcə vəziyyət dəyişməyəcək. Yun istehsalı rentabelli deyil. Bu səbəbdən Bakı Kamvol Kombinatı dayanıb», deyə “Yevlax Yun” ASC-də Turan-a bildiriblər. Onlar hesab edir ki, yun tədarükü məntəqələrinin olmaması da zavodun işini bərpasına mane olur.

Ötən illər Azərbaycanda istehsal edilən yunun bir hissəsi ixrac edilib. 2011-ci ildə xaricə 14,2 ton ($69,2 min), 2012-ci ildə 27,6 ton ($116 min) təmizlənmiş qoyun yunu ixrac edilib. Gömrük Komitəsinin məlumatına görə, ötən il ixrac dayanıb. 2013-cü ildə son 3 ildə ilk dəfə Azərbaycanın tekstil müəssisələri yun parça idxal edib. Tərkibində 85% yun olan 323,1 min m2 parça idxal olunub. 08B