"Üzə çıxan faktları göstərir ki, Mərkəzi Bank problemli bankları sağlamlaşdırmaq niyyətində deyildi", - ekspert

Bakı/07.07.20/Turan: "Mərkəzi Bank Apellyasiya Məhkəməsinin "NBC" və "AGBank"la bağlı 28 aprel tarixli qərarını özünəməxsus şəkildə şərh etdi və bu iki bankın sığorta hadisəsi ilə bağlı Əmanətlərin Sığortalanması Fonduna vaxtından əvvəl məktub göndərdi". Bunu “Turan”la söhbətində maliyyə eksperti Əkrəm Həsənov deyib.

Qeyd edək ki, yuxarıda adı çəkilən iki bankın lisenziyalarının ləğv edilməsi barədə qərar mayın 12-də verilib, bu banklardakı sığorta hadisəsi ilə bağlı Əmanətlərin Sığortalanması Fonduna məktub aprelin 28-də, yəni qərar qəbul edilməzdən 2 həftə əvvəl göndərilib.

Ekspert aprelin 27-də dörd banka – “Atabank”, “Amrahbank”, “NBC”, “AGBank”a müvəqqəti inzibatçıların təyin olunduğunu xatırlatdı. Ertəsi gün ilk iki bankın lisenziyaları ləğv edildi.

Onun fikrincə, indi ortaya çıxan faktlar Mərkəzi Bankın problemli bankları sağlamlaşdırmağa çalışmadığını göstərir, amma nədənsə vaxtı uzadırdı və bundan iki həftə sonra daha iki bankın lisenziyasının ləğv olunduğunu elan etdi.

 “Əmanətlərin Sığortalanması Fondu Mərkəzi Bankın məktubu əsasında fəaliyyət göstərir. Burda fond qanunu pozmur. Hazırda maliyyə bazarlarının tənzimləyicisi Mərkəzi Bank məktubunu məhkəmənin 28 aprel tarixli qərarı ilə əsaslandırır. Lakin bu qərar “NBC” və “AGBank”da sığorta hadisəsi elan etmək üçün əsas vermir, - deyə o bildirib.

Ə.Həsənov qeyd etdi ki, "Əmanətlərin sığortalanması haqqında" qanunun 2.1.9-cu bəndinə əsasən, sığorta hadisəsi üç halda - lisenziyanın ləğvi, iflas elanı, fiziki və hüquqi şəxslərin əmanətləri üzrə ödənişlərə, habelə digər bank öhdəliklərinə moratorium qoyulması barədə məhkəmə qərarı olduqda elan olunur.

Bununla yanaşı, o, məhkəmənin 28 aprel tarixli qərarında fiziki və hüquqi şəxslərin əmanətləri, bankın digər öhdəlikləri üzrə ödənişlərə moratorium barədə ifadənin olduğunu vurğuladı.

“Ancaq məhkəmənin 28 aprel tarixli qərarında istisna var. Qərarda bildirilib ki, banklar işçilərinə əmək haqlarını ödəməyə davam etməli, cari təsərrüfat xərclərini ödəməli, həmçinin pandemiyadan əziyyət çəkən sahələrdə çalışan muzdlu işçilərin maaşlarını ödəməli və pandemiya zamanı dövlət tərəfindən dəstək qismində mikro-sahibkarlara kompensasiyalar verməlidir. Başqa sözlə, bu istisna Mərkəzi Bankın mövqeyini heçə endirir, çünki sığorta hadisəsində heç bir istisna olmur. Ola bilməz ki, bank birinə pul ödəməyə davam etsin, digərini dayandırsın”,  deyə Əkrəm Həsənov bildirib.

O hesab edir ki, bu hadisə bir daha yüksək vəzifəli məmurların hətta özlərinin yazdıqları qanunları düzgün tətbiq edə bilmədiklərini göstərir. –71В-