Azərbaycan Milli İncəsənət Muzeyində "Ailə Festivalı"

 Azərbaycan Milli İncəsənət Muzeyində  (AMİM) cari ilin 10-12 mart tarixlərində muzeyin və "Milli İrsimiz" müəllif layihəsinin birgə təşəbbüsü ilə "Ailə festivalı” tədbirinin ikinci buraxılışı keçiriləcəkdir. Bu muzeyin və “Milli İrsimiz” lahiyəsinin müəllifi Əsli Səmədovanın birgə lahiyəsidir.

 Bu yeni təşəbbüs muzey məfhumunun sərhədlərini genişləndirərək, onu ailəvi istirahət üçün maraqlı məkana çevirmək məqsədi daşıyır. “Ailə festivalı”nın keçirilmə ideyası mədəni vakuumun doldurulmasında və ölkəmizdə ailəvi asudə vaxtın mədəni və əyləncəli keçirilmə məkanı kimi muzeylərin məşhurlaşmasında ilk addım olacaqdır. İlk Muzeydə Ailə Festivalı Azərbaycan Respublikası Mədəniyyət və Turizm Nazirliyinin dəstəyi ilə 2016-ci ilin yayında Azərbaycan Xalça Muzeyində keçirilib və gün ərzində 2 aylıq körpədən 80 yaşlı insana qədər bir neçə yüz tamaşaçı cəlb etmişdir! Ötən ildəki proqram barədə məlumatı linkdə təqdim olunan videoda  izləyə bilərsiniz!

 Festivalın ikinci buraxılışı üçün, xüsusi olaraq AMİM-in əməkdaşları və dəvət olunmuş qonaqlar uşaq və valideyn cütlüyünün birgə fəaliyyəti üçün maraqlı fəallıqlar və ustad dərsləri hazırlayıb. Muzeyin Elmi-kütləvi işlər şöbəsinin bələdçiləri muzey kolleksiyası barədə 20 dəqiqəlik mini interaktiv ekskursiyalar təqdim edəcəklər.

 Muzey proqramında xüsusi dəvət olunmuş qonaqların iştirakı da nəzərdə tutulur. Qeyd olunmalıdır ki, bütün dəvət olunmuş qonaqlar  festivalda könüllülər və layihənin partnyorları kimi iştirak edirlər.

 Festivalın proqramının əsasını xüsusi dəvət olunmuş qonaqlar- könüllülər və layihənin partnyorları təşkil edir. Onların pro-bono iştirakı və eyni zamanda ABŞ-ın Azərbaycandakı səfirliyinin dəstəyi sayəsində, 5 AZN dəyərində muzeyə sabit giriş bileti aldıqda (3 yaşdan kiçik uşaqlar pulsuz), Ailə Festivalının İkinci Buraxılışında iştirak pulsuzdur.

 Festivalın məqsədi-AMİM-da tədris və əyləncə xarakterli tədbirlərin keçirilməsi üçün uşaq guşəsinin yaradılmasında köməklikdir. Biz ümid edirik ki, festivalın mediada işıqlanması və həmçinin muzeyin tərəfdaşları və könüllülər tərəfindən göstərdiyi dəstək sayəsində, bu məsələ lazimi diqqət, inzibati və maddi dəstək alacaq. Beləliklə, Sizin festivalda iştirakınız muzeydə uşaqlara rahatlıq və istilik bəxş etməyə imkan yaradacaq!

 Sosial şəbəkələrdə, eyni zamanda muzeyin və "Milli İrsimiz" layihəsinin rəsmi səhifələrində yeni xəbərləri izləyin: təşkilatçılar çoxlu sürprizlər və maraqlı görüşlərin olacağını vəd edirlər! Festivalın tam proqramı və ustad dərsləri barədə həftənin sonunadək məlumat paylaşılacaq.

 Daha ətraflı məlumat: (+99412) 492 07 07.