Azərbaycanda qədim hamam qalıqları aşkar edilib

Bakıdan 120 km aralıda, Şamaxıda qazıntılar zamanı min ilə yaxın yaşı olan qədim hamam qalıqları aşkar edilib. Bu barədə Azərbaycan Milli Elmlər Akademiyasının www.science.gov.az saytı xəbər yayıb.

“Bu qiymətli tapıntı qədim Şirvanşahlar dövlətinin (IX-XVI sərlər) əsas iqamətgahlarından biri olan Gülüstan sarayında Arxeologiya və Etnoqrafiya İnstitutunun Şamaxı-Ağsu ekspedisiyasının əməkdaşları tərəfindən aşkar edilib”, deyə AMEA-dan qeyd ediblər.

Bundan başqa, arxeoloqlar qalaya gələn su xətti aşkar edilmişdir. Bundan başqa, buradan çoxlu sayda Şamaxı, Gülüstan, Qəbələ, Şabran, Gəncə və Təbrizdə zərb edilmiş gümüş və mis sikkələr, Azərbaycan, Cin, Mərkəzi Asiya, İran və Avropada istehsal edilmiş saxsı məmulatı, bəzək əşyaları tapılıb.

“Min illik tarixə malik Şirvanşahlar dövlətinin əsas iqamətgahlarından biri olmuş Gülüstan qalasında tədqiqatlar hələ 2011-ci ildə başlanıb. Qalada aparılan tədqiqat işləri zamanı çox sayda maddi-mədəniyyət nümunələri, müxtəlif təyinatlı binaların qalıqları, əmək alətləri və silahlar, müxtəlif formalı saxsı məmulatı, IV-XV əsrlərə aid gümüş və mis sikkələr, tunc və şüşədən hazırlanmış üzük, sırğa və bilərziklər, mineral daş, pasta və sümükdən hazırlanmış muncuqlar, daş kitabələr, top mərmiləri, qəbirlər və qalaya gedən gizli yeraltı yol aşkara çıxarılıb”, deyə Arxeologiya və Etnoqrafiya İnstitutundan bildiriblər.

Vaxtilə Gülüstan qalası güclü müdafiə obyekti olub. Tarixçilər hesab edir ki, Şamaxı Şirvanşahların paytaxtı olduğu zaman onun divarları arxasında Şirvan hökmdarlarının sarayı yerləşib. XI-XII əsrlərdə tikilmiş bu qala Orta əsrlərdə dəfələrlə ərəb-fars qoşunlarının zərbələrini dəf edib. Qala XVI əsrə qədər mövcud olub. Çoxsaylı müharibələrdən və zəlzələlərdən ziyan dəysə də, tikintinin qalıqları indiyədək qalır. Dəyirmi və dördkünc qülləli qala divarlarının qalıqlarını Şamaxı girişində görmək olar, deyə İTAR-TASS məlumat yayıb. -0-