Bakıda Rəşid Behbudovun abidəsi qoyulub

Oktyabrın 4-də Azərbaycanın paytaxtı Bakı şəhərində əfsanəvi müğənni Rəşid Behbudovun abidəsinin açılış mərasimi olub.

R.Behbudov adına Mahnı Teatrının binası qarşısında ucaldılmış abidənin açılış mərasimində prezident İlham Əliyev həyat yoldaşı ilə birlikdə, ictimai xadimlər, məşhur mədəniyyət və incəsənət xadimləri, müğənninin doğmaları, onun yaradıcılığının heyranları iştirak ediblər.

Memarı Fuad Salayev olan abidə üzərində iş 2015-ci ilin dekabrında, SSRİ xalq artistinin yüz illik yubileyi qeyd olunduğu zaman başlayıb.

Rəşid Behbudov 14 dekabr 1915-ci ildə Tiflisdə dünyaya gəlib. Atası Məcid Behbudov Şuşalı məşhur xalq müğənnisi idi. Anası Firuzə Vəkilova rus dili müəlliməsi, həmçinin Tiflis klubunda dram klubunun rəhbəri idi.

Onun şöhrətə ucalması 1945-ci ildə “Arşın Mal Alan” film-operettasında Əsgər rolu ilə başlayıb.

Behbudov milli opera və musiqili komediyanın təşəkkülü üçün çox şey edib. Əlverişli səhnə görünüşü, böyük artistlik istedadı və cazibəsi, istənilən milli musiqini anlamaq qabiliyyəti Behbudova böyük uğur qazandırıb və bu uğur ömrü boyunca onu müşaiyət edib. Müğənninin mahnı repertuarı çox geniş idi, ilk dəfə 1957-ci ildə ifa etdiyi “Ya vstretil devuşku” adlı mahnısı isə postsovet məkanında bu günə qədər hit olaraq qalır.

O, SSRİ-nin müxtəlif regionlarına və xarici ölkələrə çox sayda və uğurlu qastrollar edirdi, repertuarına mütləq çıxış etdiyi ölkələrin xalqlarının dillərində mahnılar daxil edirdi. Hindistan kəndlərindən birinin sakinlərinin dəmiryolunu bağlayıb, Behbudov qarşılarında çıxış edənə qədər sovet artistlərinin olduğu qatarı buraxmadıqları hadisəsi məşhurdur, bu barədə Vikipediyada yazılıb. Məlumdur ki, Rac Kapurun SSRİ-də prokata çıxan “Avarayam” (Awaara hoon) filmindəki mahnını Rəşid Behbudov rus və hind dillərində ifa edib.

Rəşid Behbudov 9 iyun 1989-cu ildə dünyasını dəyişib və Bakıda Fəxri Xiyabanda dəfn olunub.

SSRİ Xalq Artisti (1959), Sosialist Əməyi Qəhrəmanı (1980), Gürcüstan SSR-in Əməkdar İncəsənət Xadimi, Dağıstan MSSR-in Xalq Artisti, Azərbaycan SSR-in Xalq Artisti (1951), “Arşın Mal Alan” filmində Əsgər rolunun ifasına görə (1945) İkinci dərəcəli Stalin Mükafatına (1946), Azərbaycan SSR-in Dövlət Mükafatına (1978), iki Lenin Ordeninə (1976, 1980), Qırmızı Əmək Bayrağı Ordeninə (1966), Xalqlar Dostluğu Ordeninə (1985) və bir çox medallara layiq görülüb.