Rusiya XİN başçısı Tahir Salahovun sərgisini açıb

Moskva/21.06.19/Turan: RF xarici işlər naziri Sergey Lavrov bu gün Moskvada SSRİ, Rusiya və Azərbaycan xalq rəssamı Tahir Salahovun əsərlərindən ibarət sərgini açıb. Mərasim RF XİN-in Spiridonovkadakı iqamətgahında keçirilib.

"Tahir Salahova Moskvada sərgi keçirmək təklifini qəbul etdiyinə görə minnətdarlıq etmək istərdim, - deyə Lavrov bildirib. - İdeya mənim Bakıya səfərim zamanı ustadın sərgisini ziyarət etməyimdən sonra yaranıb, mənə elə gəlib ki, Moskvalılar bu əsərlərdən zövq ala bilməsi yaxşı olardı. Yaxşı ki, sərgi baş tutdu", deyə Lavrov bildirib.

"Məni sərgi ilə buraya dəvət etdiklərinə görə çox məmnunam, mənim üçün, demək olar ki, hər gün dünya və ölkənin həyatı ilə bağlı mühüm məsələlərin həll olunduğu bu mədəniyyət və dostluq məbədində olmaq böyük xoşbəxtlikdir. Cənab Lavrova və nazirliyin bütün əməkdaşlarına bir daha təşəkkür edirəm", deyə rəssam qeyd edib.

Ekspozisiyaya Salahovun Bakı neftçilərinə həsr olunmuş əsərləri, bəstəkarlar Qara Qarayev və Dmitri Şostakoviçin, balerina Olqa Rukavişnikovanın, qızı Aydanın portretləri, natürmortlar və interyerlər, "Çexoslovakiya", "İtaliya", "Amerika", "Hindistan", "Norveç"lə bağlı qrafik və rəsm silsilələri, "Odlar yurdu" triptixi daxildir.

Lavrov sərgiyə baxdıqdan sonra Salahova RF XİN-in idarə mükafatını - "Beynəlxalq əməkdaşlığa verdiyi töhfəyə görə" nişanını təqdim edib.

Tahir Salahov sovet, Azərbaycan və Rusiya rəssamı, teatr rəssamı, pedaqoq, Rusiya Rəssamlıq Akademiyasının vitse-prezidentidir. -02D-