Ermənistan yenidən silahlanır

Ermənistan yeni silahlar alır, XXI əsr səviyyəsində müharibədə tətbiqi mümkün olan müasir texnologiyalar alır və onları mənimsəyir. Yeni silahlarla təchizatın sovet hərbi-texniki texnologiyalarından imtina edən və müharibədə aerokosmik metodlardan istifadəni mənimsəyən Azərbaycan ordusunda islahatların aparılması nümunəsinə uyğun aparıldığı diqqət çəkir.

Azərbaycan kimi, Ermənistan da ilk peykini orbitə buraxıb, yaxın günlərdə ikinci peyki buraxmağa hazırlaşır və Yerüstü İdarəetmə Mərkəzi və Peyk Qəbulu Stansiyası tikir. Artıq avadanlıq tədarükü başlayıb, paralel olaraq mütəxəssislər hazırlanır. İlin sonuna qədər işlər yekunlaşdırılacaq.

İlk peykin buraxıldığı haqqında baş nazir Nikol Paşinyan məlumat verib, onun imkanlarını sadalayarkən Ermənistanın yerüstü sərhədlərinə nəzarət məsələsinə toxunub.

“Peykimiz rabitə peyki deyil. Bu, Yer kürəsini uzaqdan tədqiq edən peykdir”, deyə yüksək texnologiyalar sənayesi naziri Robert Xaçatryan bildirib. Nazirin sözlərinə görə, hökumət əldə edilən nailiyyətlərlə kifayətlənmək niyyətində deyil, digər iddialı kosmik layihələr də var, amma o, bu layihələri açıqlamayıb.

Ermənistan əsas tərəfdaşı – İspaniyanın Satlantis şirkəti ilə danışıqlar aparır, amma hökumət “yeni əməkdaşlıq” üçün də açıq olduğunu elan edir. İlk peyk Ermənistanın “Geokosmos” dövlət QSC və Satlantis şirkətinin əməkdaşlığı nəticəsində kosmosa buraxılıb. Bu şirkət 2013-cü ildə ABŞ-da təsis edilib, bir il sonra baş ofis İspaniyaya köçüb.

Azərbaycanda 2020-ci il müharibəsində hədəfin təyin edilməsi üçün peyk triadasından istifadə olunub. Hədəflər yerli, İsrail və Türkiyə istehsalı olan yerüstü odlu silahlar və zərbəçi pilotsuz uçuş aparatları ilə məhv edilib.

Mumbaidə ən böyük ingilisdilli qəzetlərdən biri – Dnalndia Yerevanın Hindistandan hərbi PUA və digər silahlar almaq niyyətində olduğunu bildirib. Nəşrin məlumatına görə, bu ilin iyununda Ermənistan Müdafiə Nazirliyinin nümayəndə heyəti ehtiyacı olan silahların siyahısı ilə Dehliyə gedib.

Ermənistan Müdafiə Nazirliyinin rəsmi saytında Hindistana səfər haqqında məlumat dərc edilməyib. Nazirlik mümkün sövdələşmə haqqında şaiyələri təkzib etməyib, amma onlarla bağlı şərh də verməyib.

Dehlidə həmçinin erməni məmurun Qarabağda 2020-ci il müharibəsinin ölkənin hərbi tələbatlarını yenidən nəzərdən keçirməyə vadar etdiyi barədə sözləri də sitat gətirilir. Hindistan nəşri məmurun adını açıqlamır, amma onun sözlərindən sitat gətirir: “Müharibə Rusiya hərbi texnikasının Türkiyə silahlarına, xüsusən Bayraktar PUA-larına qarşı nə qədər yararsız olduğunu göstərdi”.

DnaIndia məhz hansı silahın alınması haqqında danışıqlar aparıldığına, sövdələşmənin bağlanıb-bağlanmadığına və məbləğinə dəqiqlik gətirmir.

Aprelin 13-də Ermənistanın müdafiə naziri Suren Papikyan Hindistanın Ermənistandakı səfiri Kişan Dan Devalı qəbul edib. Papikyan və Devalın “hərbi-siyasi məsləhətləşmələr, yüksək səviyyədə qarşılıqlı səfərlər, habelə Ermənistan və Hindistanın müdafiə nazirlikləri arasında hərbi əməkdaşlıq haqqında saziş imzalanması zərurətini” müzakirə etdikləri bildirilib.

Ermənistan ordusunun yenidən silahlanması trendi 2021-ci ilin fevralında müəyyən edilib. “Ermənistan silahlı qüvvələrə yeni komplekslər, silah sistemləri və hərbi texnika təqdim edir, daha çox zabit, dövlət qulluqçusu və müqavilə əsasında hərbi qulluqçu cəlb edir. Əsas diqqət idarəetmə, kəşfiyyat, radioelektron mübarizə, hava hücumundan müdafiə sistemlərinin, raket qoşunlarının, artilleriyanın inkişafına və PUA-ların istehsalına yönəldiləcək”, deyə RBK bildirir.

Müdafiə naziri Arşak Karapetyan bildirib ki, Ermənistan hakimiyyəti ölkədə yeni müasir ordunun yaradılması üçün hərbi sənayenin inkişafı üzrə qətiyyətli addımlar atmaq niyyətindədir. “Biz yeni silahlar almağı planlaşdırırıq, köhnə silahları almaqdan imtina etdik. Az, amma yüksək keyfiyyətli silahımız olması daha yaxşıdır. Əsas odur ki, bu silahların işlədiyindən əmin olaq”, deyə Karapetyan bildirib.

Avqustun 18-də Ermənistanın baş naziri Nikol Paşinyan hökumətin 2021-2026-cı illər üçün proqramını təqdim edərkən Ermənistan SQ-də islahatlar aparmaq və onu müasirləşdirmək niyyətini bəyan edib.