2012-2015-ci illər üçün korrupsiyaya qarşı mübarizəyə dair Milli Fəaliyyət Planı təsdiqlənib

Azərbaycan prezidenti İlham Əliyev 2012-2015-ci illər üçün korrupsiyaya qarşı mübarizəyə dair Milli Fəaliyyət Planını təsdiqləyib. 

Plan müxtəlif fəaliyyət sahələrini əhatə edən 28 maddədən ibarətdir. Planda korrupsiyaya qarşı mübarizə tədbirləri ilə bağlı qanunvericilik bazasının təkmilləşdirilməsinə xüsusi yer ayrılır.

Xüsusən, korrupsiya halları haqqında məlumat verən şəxslərin müdafiəsinə dair və hüquqi şəxslər barəsində cinayət-hüquqi tədbirlərin tətbiqi qaydalarına dair  qanun layihəsinin hazırlanması nəzərdə tutulur.

Bundan başqa, Korrupsiyaya qarşı mübarizədə şahidlərin və cinayət təqibini həyata keçirən orqanlarla əməkdaşlıq edən şəxslərin müdafiəsinin təkmilləşdirilməsi üzrə əlavə tədbirlər görülməsi nəzərdə tutulur. Bununla yanaşı, korrupsiya cinayətləri üzrə istintaq sövdələşməsinin cinayət-prosessual qanunvericiliyə daxil edilməsi üzrə təkliflərin hazırlanması haqqında təklif hazırlanması planlaşdırılır.

Plan həmçinin Korrupsiyaya qarşı mübarizə sahəsində hakimlərin toxunulmazlıq hüququnun məhdudlaşdırılması üzrə təkliflərin hazırlanmasını nəzərdə tutur.

Plana cinayət yolu ilə əldə edilmiş pul vəsaitlərinin leqallaşdırılmasına qarşı mübarizə üzrə institusional mexanizmlərin təkmilləşdirilməsi üzrə tədbirlər daxil edilib.

AŞ-nın cinayət yolu ilə əldə edilmiş gəlirlərin leqallaşdırılmasının və terrorizmin maliyyələşdirilməsinin qarşısının alınması üzrə konvensiyasının ratifikasiyası nəzərdə tutulur.

Dövlət xidmətinə aid bir sıra tədbirlər nəzərdə tutulur. Xüsusən, dövlət qulluğuna qəbul sisteminin və ümumilikdə onun fəaliyyətinin şəffaflığının artırılması üzrə tədbirlər kompleksi nəzərdə tutulur. Dövlət xidməti sistemində rotasiya prinsipinin tətbiqi üzrə pilot layihələrin həyata keçirilməsini nəzərdə tutan bənd xüsusi diqqət çəkir. Dövlət qulluqçularının əmək haqqının mərhələli artırılması və sosial təminatların gücləndirilməsi nəzərdə tutulur.

Vəzifəli şəxslərin öhdəliklərinə korrupsiya faktlarından şikayət edən vətəndaşların müntəzəm qəbulu aid ediləcək.

Həmçinin dövlət orqanlarında qaynar xətlərin təşkilinin vahid metodologiyasının müəyyən edilməsi nəzərdə tutulur.

Planda vətəndaşların müdafiəsi və əmlakının bərpası üzrə tədbirlər nəzərdə tutulur. Biznes sahəsində yoxlamaların şəffaflığının təmin edilməsi, mənimsənmiş əmlakın bərpası üzrə ölkədaxili mexanizmlərin işlənib hazırlanması da onların sırasındadır. 

Plana maraqların toqquşmasının qarşısının alınması haqqında maddə də daxil edilib. Lakin konkretlik və dəqiqlik yoxdur və bu maddə cəmi üç bənddən ibarətdir. Birinci bənd məmurların maraqlarının toqquşmasının qarşısının alınması üzrə qanunvericiliyin təkmilləşdirilməsi üzrə təkliflərin hazırlanmasından ibarətdir. Daha sonra maraqların toqquşmasının qarşısının alınması üzrə “treninqlər keçirilməsi” nəzərdə tutulur. Və nəhayət, vəzifəli şəxslərin maliyyə xarakterli məlumatları elektron formada verilməsi üzrə təkliflərin hazırlanması nəzərdə tutulub.

Plan hökumətin nağd hesablamalarının minimuma endirilməsi üzrə niyyəti təsdiq edir. 

Bir çox xidmətlər elektron formaya keçirilir. Belə ki, daşınmaz əmlakın dövlət reyestrindən elektron formada çıxarışlar veriləcək. Sahibkarlıq fəaliyyətinin müxtəlif növlərinə lisenziyalar verilməsinin də elektron formaya keçirilməsi nəzərdə tutulur.

Planda dövlət orqanlarının vətəndaş cəmiyyəti institutları ilə əməkdaşlığı nəzərdə tutulur. 

Qeyd edək ki, bu, 2004-cü ildən bu günə qədər qəbul edilən korrupsiyaya qarşı mübarizə üzrə üçüncü milli fəaliyyət planıdır.

Bu arada, beynəlxalq təşkilatların məlumatına görə, Azərbaycan hələ də korrupsiyanın səviyyəsinin yüksək olduğu ölkələr sırasındadır.

Transparency International beynəlxalq qeyri-hökumət təşkilatının 2011-ci ildə dünya ölkələrində korrupsiya səviyyəsinin İndeksinə əsasən, Azərbaycan 182 ölkə arasında 143-cü yeri tutub. -06D-