ABŞ CQD-nin təhlükəsizliyinə xüsusi diqqət yetirir

Bakı/19.08.20/Turan: ABŞ-ın Azərbaycandakı səfiri Erl Litzenberger Cənub Qaz Dəhlizinin (CQD) inkişafı ilə bağlı əsas vəzifələrdən biri kimi Xəzər dənizində yeni əlaqələrin qurulması yolu ilə qaz axınının genişləndirilməsini və qaz kəmərləri infrastrukturunun təhlükəsizliyinin təmin edilməsini göstərib.

O, bu barədə avqustun 11-14-də Bakıda Azərbaycan, Gürcüstan və Türkiyədə enerji və beynəlxalq təhlükəsizlik sahəsində çalışan dövlət qulluqçuları və peşəkarlar üçün keçirilən Regional Enerji Təhlükəsizliyi Simpoziumunda çıxış edərkən bildirib.

Litzenberger qeyd edib ki, “Birləşmiş Ştatlar enerji təhlükəsizliyi məsələsini milli təhlükəsizlik məsələsi kimi qəbul edir”.

Səfir qeyd edib ki, enerji təchizatında yaranan məcburi fasilələr mühüm və zərərli təsirə malikdir. Texniki qüsurlar, təbii fəlakətlər, sabotaj əməlləri və ya təchizatçı tərəfindən verilən qərarlar müəyyən çağırışların gündəmə gəlməsinə səbəb ola bilər.

“Bunun hamısı bir tərəfdən mühüm infrasrukturun mühafizəsinin gücləndirilməsi, digər tərəfdən isə qlobal qaz bazarının inkişafına dair ehtiyacın olduğunu göstərir. İllər boyu kommersiya və strateji tərəfdaşları ilə birgə işləyən Azərbaycan davamlı infrastrukturunun qurulmasında uğur qazanmışdır”, deyə o bildirib.

NATO-nun enerji təhlükəsizliyi doktrinasının işlənib hazırlanmasında iştirak edən Litzenberger qeyd edib ki, gücləndirilmiş infrastruktur əhalini potensial iqtisadi sarsıntılardan və real təhlükələrdən qoruya bilər. Azad bazarlar isə dünyada iqtisadi inkişafa təkan verir və enerji təchizatından siyasi məqsədlər üçün istifadə olunmamasını təmin edir. 

Azərbaycanın mühüm energetika və kiber-infrastrukturunun qorunması zərurəti ilə əlaqədar Azərbaycanda intellektual mülkiyyət hüquqlarının müdafiəsinin gücləndirilməsinin tərəfdarı olduğunu bildirib.

“Amerika Ticarət Palatası bizə söz vermişdir ki, qurumun üzv şirkətləri yalnız lisenziyalaşdırılmış proqramlardan istifadə edəcək. Lakin bu sahədə görüləsi çox iş var”, deyə o bildirib.

Səfirin sözlərinə görə, kibertəhlükəsizlik enerji infrastrukturunun təhlükəsizliyinin vacib elementidir. “Vurğulamaq istəyirəm ki, Birləşmiş Ştatlar məhz bu sahəyə küllü miqdarda vəsait xərcləməyə davam edir.

Biz Azərbaycanı intellektual mülkiyyət hüquqlarının təmin olunması və potensial hücumlara qarşı sistemin gücləndirilməsi məsələlərinə prioritetlə yanaşmağa çağırırıq”, deyə o bildirib.

Erl Litzenberger Birləşmiş Ştatların bundan sonra da dünyada etibarlı enerji təchizatçısı rolunu inkişaf etdirən Azərbaycana öz dəstəyini verməyə hazır olduğunu qeyd edib.

“Birləşmiş Ştatların Cənub Qaz Dəhlizi layihəsinə qatılan dövlət və şirkətlərə göstərdiyi dəstəyi yenidən vurğulamaq istəyirəm”, deyə ABŞ səfiri bildirib. -0-