ABŞ Gürcüstanı demokratiya yoluna qayıtmağa çağırır

Şənbə günü Birləşmiş Ştatlar bu ilin oktyabrında keçiriləcək parlament seçkilərində qalib gələcəyi təqdirdə, siyasi rəqiblərini qanundan kənar elan edəcəyinə söz verən Gürcüstanın hakim partiyasının son bəyanatlarına cavab verib.

“Birləşmiş Ştatlar hakim “Gürcü Arzusu” partiyasının getdikcə artan antidemokratik ritorikasından və hərəkətlərindən dərin narahat olaraq qalır. Müxalifətin qanunsuz elan edilməsi planları ilə bağlı bəyanatlar da buna misaldır”, - Dövlət Departamentinin nümayəndəsi Turan-ın suallarını cavablandırarkən deyib.

Hökumətin hərəkətləri Gürcüstan xalqının istəklərinə ziddir və demokratik dəyərlərlə bir araya sığmır. Dövlət Departamentinin sözçüsü Turan-a müsahibəsində deyib:

“Biz Gürcüstan hökumətini insan hüquqlarına və əsas azadlıqlarına hörmətlə yanaşmağa, öz tənqidçilərini düşmən elan etməmək, demokratiya və Avro-Atlantik inteqrasiya yoluna qayıtmağa çağırırıq”.

Gürcüstanın baş naziri İrakli Kobaxidze cümə günü bildirib ki, hökumət oktyabrda keçiriləcək parlament seçkilərindən sonra bir neçə siyasi partiyanı, o cümlədən eks-prezident Mixail Saakaşvilini dəstəkləyən partiyanı qadağan edəcək.

Kobaxidze Rusiyanın 2008-ci ildə Gürcüstana müdaxiləsində Saakaşvilinin partiyasını günahlandırıb və onun tərəfdarlarının Rusiya-Ukrayna müharibəsində “ikinci cəbhə” açmaq istədiyini iddia edib. Kobaxidzenin sözlərinə görə, parlamentdə qərbyönlü fraksiyalar bağlana bilər və bu partiyalardan seçilən deputatların vəzifəyə başlaması qadağan ediləcək.

Gürcüstanda parlament seçkiləri oktyabrın 26-da keçiriləcək. Bu yay altı müxalifət partiyası hakim partiyaya qarşı çıxmaq üçün birgə işləmək barədə razılığa gəliblər.