ABŞ-ın yüksək rütbəli rəsmiləri Brüsseldə keçirilən sammitin yekunları haqqında

Turanın Vaşinqton müxbiri xəbər verir ki, Bayden administrasiyasının Avropa və Avrasiyadan məsul olan yüksək səviyyəli rəsmiləri cümə günü jurnalistlərə Avropa Komissiyasının sədri Ursula fon der Leyen, ABŞ dövlət katibi Antoni Blinken və Ermənistanın baş naziri Nikol Paşinyan arasında keçirilən görüşün nəticələrini şərh ediblər.

“Görüşün məqsədi diqqəti Ermənistanın iqtisadiyyatının şaxələndirilməsi, siyasi islahatlar və humanitar problemlərə yesım etmək olub”, - deyə dövlət katibinin köməkçisi Ceyms O'Brayen bildirib.

O, Vaşinqtonun Ermənistanın müstəqilliyini, suverenliyini və ərazi bütövlüyünü “qəti dəstəklədiyini” vurğulayıb. “Biz həmçinin 2018-ci ilin Məxməri İnqilabından sonra Ermənistandakı demokratik transformasiyalara heyranlığımızı qeyd etdik. Biz Ermənistan xalqının demokratik istəklərini əks etdirəcək qlobal iqtisadiyyat və siyasi sistemin qurulması istiqamətində mühüm islahatların və səylərin şahidi olduq. Və məqsədimiz bu dəstəyi davam etdirməkdir”.

“Görüş Ermənistan və Azərbaycan arasında sülh sazişinin əldə edilməsi səyləri kontekstində keçirilir və biz Ermənistanı Azərbaycanla yekun razılaşma əldə etməyə çalışmağa çağırdıq. Bu, Aralıq dənizindən Mərkəzi Asiyaya yeni ticarət yolları açaraq, uzunmüddətli perspektivdə regionun təhlükəsizliyini və onun inkişafını təmin etmək üçün ən yaxşı yoldur”, - deyə O’Brayen davam edib.

Rusiya Ermənistanda Qərbin əlaqələrinə niyə xələl gətirmək isrəyir? Bu suala O'Brayen Rusiyanın regionda ənənəvi rolunun olduğunu deyib. Amma Ermənistan xalqı demokratiya yolunu seçib və bu qərara hörmətlə yanaşmaq vacibdir.

“Bölgədə Rusiyanın dezinformasiyaya və mediada manipulyasiyasına işlərini görürük, Brüsseldəki görüşdə də belə oldu. Ona görə də regional iqtisadi inteqrasiyanı təşviq etmək vacibdir və Azərbaycanın da bunu istəməsi vacibdir”, - O’Brayen bildirib.

İlham Əliyevin Brüssel görüşü Azərbaycanı "təcrid edəcəyi" ilə bağlı son bəyanatı ilə bağlı suala cavabında O'Brayen bildirib ki, son iki gündə həm dövlət katibi Blinken, həm də Ursula fon der Leyen prezident Əliyevlə danışıblar. “Söhbətlər çox konstruktiv keçdi və prezident bizim nə istədiyimizi anladı. Amma bizim necə hərəkət etməyimizlə bağlı öz fikirləri var. Eyni zamanda, o, hər bir ölkənin Avropa və ABŞ ilə münasibətlərinin ölkənin özünün işi olduğunu etiraf etdi”, - deyə O'Brayen bildirib.

Brüsseldəki görüş ərəfəsində Vaşinqtonun açıqlamaları niyə rəsmi Bakını inandırmadı? TURAN müxbirinin bu sualını cavablandıran O'Brayen deyib:

“Mən heç vaxt Azərbaycanı konfransın keçirilməsinə razı salmağı özümə borc hesab etməmişəm. Biz nə edəcəyimizi çox açıq şəkildə bildirdik və dediklərimizi də yerinə yetirdik.

Biz planlarımızı region hökumətləri ilə çox açıq müzakirə edirik ki, sürprizlər olmasın. Amma mən hesab edirəm ki, Azərbaycan nümayəndələrindən soruşmaq lazımdır ki, onlar nə üçün belə edirlər.

Bizim mövqeyimiz sadədir, biz Ermənistan xalqının seçimini dəstəkləyirik və bundan sonra da dəstəkləyəcəyik. bütövlükdə region üçün sülh, təhlükəsizlik və rifah istəyirik”.

ABŞ Avropa İttifaqında Ermənistanın gələcəyini görürmü? - Turanın bu sulına diplomat cavab verdi ki, Ermənistan xalqı firavanlıq və qlobal bazarlara inteqrasiya yolunu seçir ki, bu da bir sıra islahatlar və dəstək tələb edir. Aİ həmçinin işgüzar əməkdaşlığın və investisiyaların artırılması üçün proqram elan edib. "Hər şey ölkənin necə irəliləyəcəyindən asılı olacaq."

ABŞ-ın səylərinə gəlincə, USAID administratorunun köməkçisi Erin Makki  bildirib ki, ötən payızda Dağlıq Qarabağda baş vermiş hadisələrdən sonra USAID Ermənistana psixososial dəstək və köçkünlərin və qaçqınların mənzil ehtiyaclarını həll etmək üçün təxminən 8,5 milyon dollar ayırmağı planlaşdırır.

O, daha sonra əlavə etdi: “Biz həmçinin enerji təhlükəsizliyinin və Ermənistanın müstəqilliyinin qurulmasına diqqət yetirmişik. 8,6 milyon dollar dəyərində olan yeni proqramımız Ermənistanın bərpa olunan enerji mənbələrinə çıxış və inteqrasiya imkanlarını təkmilləşdirəcək.

USAID həmçinin erməni fermerlər arasında taxıl istehsalı və saxlama qabiliyyətinin artırılması səylərini dəstəkləməklə Ermənistanın ərzaq təhlükəsizliyinin sabitləşməsinə kömək edəcək. Qarşıdan gələn 6 milyon dollarlıq ərzaq təhlükəsizliyi proqramı əsas bitkilərin kənd təsərrüfatı məhsuldarlığını artıracaq.

ABŞ həmçinin lazımi islahatları və hökumətin imkanlarını artırmagda davam edəcək. “Lakin ən əsası, biz insan ləyaqətini əsas prioritet olmaqla Ermənistan xalqını dəstəkləməyə yönəlmişik. USAID həmçinin vəhşiliklərə və son münaqişələrə dair hər hansı sübutların toplanmasına kömək edəcək ki, məsul şəxslər öz əməllərinə görə cavabdeh olsunlar”.