ABŞ və Avropa İttifaqı Kremlə qarşı birgə hərəkətləri müzakirə ediblər

Vaşinqton/31.03.22/Turan: Çərşənbə günü Vaşinqtonda Avropa İttifaqı və ABŞ-dan olan diplomatlar Ukrayna ətrafında vəziyyəti, həmçinin Cənubi Qafqaz da daxil olmaqla, daha geniş regionda sabitliyin qorunub-saxlanmasını müzakirə ediblər,  Turan-ın Vaşinqton müxbiri məlumat verib.

"İlk iclas ABŞ və Avropa İttifaqının Rusiyanın Ukraynaya qarşı təcavüzkar müharibəsinin dayandırılmasına yönəlmiş strateji məqsədlərinə və koordinasiyasına həsr olunub",- birgə məlumatda bildirilir.

ABŞ-ı dövlət katibinin müavini Viktoriya Nuland, Avropa İttifaqını isə Avropa Xarici Əlaqələr Xidmətinin baş katibinin müavini Enrike Mora təmsil edib.

Tərəflər Kremlin Ukraynaya qarşı əsassız və barbarcasına müharibəsini pisləyiblər.

Nuland və Mora Rusiyanın ABŞ və Avropa İttifaqı iqtisadiyyatından, eləcə də beynəlxalq maliyyə sistemindən gələcək təcridi üçün əlavə addımları müzakirə ediblər. Onlar ABŞ və Avropa İttifaqının Kremlin təbliğatına və dezinformasiyasına qarşı, həmçinin Avropanın Rusiya enerji daşıyıcılarından asılılığının azaldılması üzrə  səylərini qiymətləndiriblər

"ABŞ və Avropa İttifaqı Rusiya vətəndaş cəmiyyətini, müstəqil jurnalistləri və gələcəyi Rusiyada təhlükə altında olan gəncləri, eləcə də ölkəni tərk etmək məcburiyyətində qalanları dəstəkləyir", - bəyanatda deyilir.

Dövlət Departamentinin məlumatına görə, Vaşinqton müharibə səbəbindən Rusiya və Belarusun məsuliyyətə cəlb edilməsini, həmçinin, Çin də daxil olmaqla, bütün ölkələrin Rusiyaya maddi dəstəkdən imtina etməsinin vacibliyini avropalı müttəfiqlərilə müzakirə edir.

Çərşənbə günü dövlət katibinin müavini Vendi Şerman Fransa, Almaniya, İtaliya və Böyük Britaniyadan olan həmkarları ilə bu və digər məsələlərlə bağlı danışıb.

"Onlar Ukraynada humanitar vəziyyətin pisləşməsini və Putin müharibəsinin qlobal ərzaq təhlükəsizliyinə təsirini müzakirə ediblər", - Dövlət Departamentinin məlumatında deyilir. -25B-