ADİ rəsmi Bakını siyasi fəallara qarşı repressiyada ittiham edib

“Avropa Dəyərlərinə İnteqrasiya” (ADİ) ictimai birliyi ölkədə insan haqlarının pozulmasına dair çərşənbə günü RATİ-də mətbuat konfransı keçirib. 

Birliyin sədri Elnur Məlik ölkədə ictimai fəallıq artdıqca iqtidarın fəal siyasi vətəndaşlara təzyiqlərinin artdığının müşahidə olunmasına diqqət çəkib. İctimai fəallığın artması ilə əsassız həbslərin, istintaqların, məhkəmə proseslərinin artdığı qeyd edilib. Məhkəmə proseslərində hakimlərin müdafiə tərəfin vəsatətlərini hər-hansı izah vermədən rədd etməsinin artıq “milli ənənəyə” döndüyü vurğulanıb. 

Son vaxtlar gənclərin həbslərinin artması haqda danışılıb və bu həbslər iqtidarın yetişməkdə olan azad gəncliyi qorxutmaq cəhdi kimi dəyərləndirilib. Müstəqil gənclər qurumlarının fəallarına qarşı olan hücumlar məhz bu siyasətin nəticəsi kimi qiymətləndirilib. İctimai fəalların saxlanılarkən fiziki zorakılıqlara məruz qalmalarının danılmaz olduğu yada salınıb, amma işgəncə faktına görə güc orqanları əməkdaşlarından heç kəsin cəzalandırılmadığı  qeyd edilib. 

Birlik belə bir ictimai durumdan çıxış yolu kimi BMT-nin İnsan Haqları günü  elan etdiyi dekabrın 10-da ölkənin hüquq-müdafiə qurumlarını kütləvi dinc etiraz aksiyasına çağırıb. -05C-