AİHM Dağlıq Qarabağda münaqişə ilə əlaqədar müvəqqəti tədbirlər barədə

Strasburq/05.11.20/Turan: Sentyabrın 27-dən Avropa İnsan Hüquqları Məhkəməsinə (AİHM) Dağlıq Qarabağ regionu və onun ətrafında silahlı münaqişəyə dair bir neçə sorğu daxil olub, bu barədə Avropa məhkəməsinin 4 noyabr tarixli məlumatında deyilir.

29 sentyabr tarixli qərarla məhkəmə Azərbaycan və Ermənistanı İnsan Hüquqları Konvensiyasının 2-ci və 3-cü maddələrində (işgəncələrin qadağan edilməsi hüququ) nəzərdə tutulmuş mülki əhalinin hüquqlarının pozulmasına səbəb ola biləcək hər hansı tədbirlər, o cümlədən hərbi əməliyyatlar aparmaqdan çəkinməyə çağıraraq 39-cu məhkəmə reqlamentini tətbiq edib.

Oktyabrın 6-da məhkəmə 39-cu qaydanı yenidən tətbiq etməyə qərar verərək Türkiyə də daxil olmaqla, münaqişəyə birbaşa və ya dolayısı ilə cəlb edilmiş bütün dövlətləri mülki şəxslərin hüquqlarının pozulmasına xidmət edən hərəkətlərdən çəkinməyə və Konvensiya üzrə öhdəliklərinə əməl etməyə çağırıb.

Oktyabrın 18-də Ermənistan hökuməti münaqişə zamanı götürülmüş hərbi əsirlər və digər şəxslərlə rəftar zamanı beynəlxalq humanitar hüququn pozulduğunu iddia edərək Azərbaycana qarşı sorğu göndərib.

Oktyabrın 26-da Azərbaycan hökuməti Ermənistana qarşı sorğu göndərərək mülki hədəflərin hücumlara məruz qaldığını bildirib və ərazi süverenliyi məsələsi qaldırılıb.

Məhkəmə qeyd edir ki, iki dövlətlərarası sorğu məhkəmənin yurisdiksiyasına aid olmayan məsələlərə toxunur. Buna görə də məhkəmə hesab edir ki, dövlətlərarası sorğularda qaldırılan məsələlər artıq qəbul edilmiş qərarlarla tənzimlənir. Məhkəmə bu qərarları təsdiqləyir və hər hansı əlavə tədbirlər üçün heç bir səbəb görmür.

Məhkəmə həmçinin ayrı-ayrı əsirlərlə bağlı Ermənistan və Azərbaycan hökumətləri və ya əsirlərin qohumları tərəfindən çoxsaylı sorğular alıb. Bu hallarda məhkəmə 39-cu qaydaya baxılmasını dayandırıb və cavabdeh hökumətə həmin şəxslərin saxlanılması, belə olduğu halda hansı şəraitdə saxlanılması barədə məlumat verməyi təklif edib.

Məhkəmə təkidlə Ermənistan və Azərbaycanı müvafiq prosedurlarda iştiraka çağırır.-06D-