Almaniya səfiri Turan agentliyinin qonağı olub

Bakı/04.02.21/Turan: Fevralın 4-də Almaniyanın Azərbaycandakı səfiri Volfqanq Maniq Turan İnformasiya Agentliyinin qonağı olub.

Agentliyin işi ilə tanışlıq zamanı Cənubi Qafqaz regionunda, o cümlədən Ermənistanla Azərbaycan arasında informasiya etimadının yaradılması imkanları ilə bağlı bu KİV-in jurnalistləri ilə fikir mübadiləsi aparılıb.

Səfir öz ölkəsinin mövqeyini ifadə edərək Almaniya hökumətinin Qarabağ münaqişəsinin nizamlanmasında, iki dövlət və xalq arasında inamın yaradılmasında, iki ölkənin rifahı naminə uzunmüddətli sülhün təmin edilməsində KİV-in rolunun artırılmasında maraqlı olduğunu bildirib.

44 günlük müharibə dövründə düşmənçilik dili hər iki ölkənin KİV və sosial şəbəkələrində çoxalıb, cəmiyyətlərdə özgəninkiləşdirmə və nifrəti artırıb. Dil zorakılığının bu cür vüsət alması sülhün bərpası yolunda ciddi maneə ola biləcək təhlükəli tendensiya kimi qəbul edilib.

Volfqanq Maniq qeyd edib ki, Almaniya ölkələr və xalqlar arasında informasiya körpülərinin qurulmasında vacib rol oynayan jurnalistlər arasında inam və qarşılıqlı hörmətin yaradılmasına yardım göstərməyə hazırdır.

“Almaniya hər zaman müxtəlif ölkələrdə, o cümlədən Ermənistan və Azərbaycanda jurnalistlərin peşə-etik səviyyəsinin artırılması üçün müxtəlif proqramlardan istifadə edib və azərbaycanlı və erməni jurnalistlərin birgə görüşləri, treninqləri üçün meydança olmaqdan ötrü lazımi addımlar atmağa hazırdır", - səfir deyib.

Agentliyin direktoru Mehman Əliyevin fikrincə, müharibə bitdikdən sonra düşmənçilik informasiya gərginliyi nəzərəçarpacaq dərəcədə səngiyib və KİV-də hər iki tərəfdən düşmən obrazını formalaşdıran materiallar azalıb.

Onun fikrincə, Ermənistan və Azərbaycan hökumətlərinin müvafiq addımlar atacağı təqdirdə düşmənçilik dilindən qarşılıqlı anlaşma dilinə keçid daha təsirli ola bilər.

"Əgər siyasi səviyyədə tərəflər sülh və əməkdaşlıq haqda razılığa gəlsələr, bu, mütləq KİV-ə də sirayət edəcək ki, bu da prosesi daha effektiv edəcək", -  o deyib.

Səfir və jurnalistlər ümumilikdə KİV-də vəziyyət, Azərbaycanda Medianın İnkişafı Agentliyinin yaradılması perspektivləri barədə fikirlərini bölüşüblər.

Səfir Maniq də müharibə, sülhə keçid və mediada vəziyyətlə bağlı agentliyə müsahibə verib.--0—