Amnesty International: Həbs edilmiş NİDA fəalları "vicdan məhbusları"dır

Amnesty İnternational beynəlxalq hüquq müdafiə təşkilatı "NİDA" vətəndaş hərəkatının həbs edilmiş dörd fəalını "vicdan məhbusu" adlandırıb və onların dərhal azad edilməsini tələb edib.

Bu çağırış təşkilatın Azərbaycan prezidenti İlham Əliyevə və baş prokuror Zakir Qaralova göndərilmiş müraciətində yer alır.

Martın 7-də NİDA-nın üç fəalı - Bəxtiyar Quliyev, Şahin Novruzlu və Məmməd Əzizov saxlanılıb. Hüquq-mühafizə orqanlarının məlumatına görə, onlar "martın 10-da keçirilməsi planlaşdırılan qanunsuz aksiya zamanı vətəndaşları zorakılığa və qarşıdurmaya təhrik etmək niyyətində olan üç şəxs" haqqında operativ məlumat əsasında saxlanılıblar.

İstintaqın məlumatına əsasən, saxlanılan şəxslərin mənzilində "Molotov kokteyli" və narkotik maddə aşkar olunub. Həbs olunanların doğmaları bildiriblər ki, bu əşyaları axtarışı həyata keçirən şəxslər özləri ilə gətiriblər. Martın 14-də mütəşəkkil qrupun tərkibində qanunsuz olaraq partlayıcı maddələr saxlamaq ittihamı ilə NİDA-nın idarə heyətinin üzvü Rəşad Həsənov saxlanılıb.

 Lakin, Amnesty İnternational-ın müraciətində qeyd edilir ki, saxlandıqdan sonra barələrində 3 ay həbs qətimkan tədbiri seçilmiş bütün gənclər vəkil seçmək imkanından məhrum ediliblər və dövlət vəkillərinin iştirakı ilə dindiriliblər. 

 Bundan başqa, Əzizovun, Quliyevin və Novruzlunun ifadələrinin televiziyada nümayiş olunması Amnesty İnternational-ın onların "işgəncə və digər amansız davranış vasitəsilə" buna məcbur edildikləri barədə narahatlığına səbəb olur. 

 Amnesty İnternational-ın müraciətində qeyd edilir ki, fəalların qohumları narkotiklərin və yandırıcı qarışıqların axtarış zamanı mülki geyimli polislər tərəfindən evə qoyulduğunu iddia edirlər.

 Yuxarıda deyilənləri nəzərə alaraq, Amnesty İnternational dörd fəalı "müstəsna olaraq ifadə və toplaşmaq azadlığı hüququnu dinc şəkildə həyata keçirməyə" görə həbs olunmuş "vicdan məhbusu" hesab edir. Təşkilat fəalların dərhal və qeyd-şərtsiz azad edilməsinə çağırır.

 Amnesty İnternational həmçinin fəallara işgəncələ yol verilməməsini, onların lazımi tibbi yardımla və seçdikləri vəkillə təmin edilməsini zəruri hesab edir.

Bundan başqa, Əzizov, Quliyev və Novruzluya qarşı işgəncələr və digər amansız davranışlar haqqında bəyanatların dərhal səmərəli və müstəqil araşdırılması çağırışı yer alır.

Bununla yanaşı, Amnesty İnternational Azərbaycan hakimiyyətini vətəndaşların ifadə və toplaşmaq azadlığı hüquqlarına hörmət etməyə, öz hüquqlarını həyata keçirdiyinə görə vətəndaşların təqibinə son qoymağa çağırır. -06D-