A.Paşazadə: İslam dünyası fəlakətə sürüklənir

Cümə axşamı Milli Elmlər Akademiyasının Dairəvi zalında “İslam maariflçiliyi və müasir dövr” beynəlxalq konfransı öz işinə başlayıb.

Öncə Azərbaycan dövlət başçısı İlham Əliyevin konfrans iştirakçılarına müraciəti oxunub. Dövlət başçısı qloballaşan dünyada dini-etnik zəmində münaqişələrin, dini ekstremizm və islamofobiya kimi zərərli təzahürlərin, dinin şübhəli siyasi iddialara alət edilməsi halların gerçəklik olmasına diqqət çəkib. İ.Əliyevə görə, bu səbəbdən cəmiyyətdə dinin yeri, maarifçilik rolu, beynəlxalq münasibətlərdə birləşdirici missiyası, sisvilizasiyalar və dinlərarası dialoq zərurəti getdikcə aktuallıq kəsb edir.

Müraciətində Azərbaycanın dünyanın dini tolerantlıq mərkzələrindən biri olduğunu deyən dövlət başçısı konfrans iştirakçılarının Bakıda bir araya gəlmələrini təqdirəlayiq hal hesab etdiyini də nəzərə çatdırır. Son olaraq İ.Əliyev müraciətində aparılan müzakirələrin dini-etnik dözümlülüyə öz tövhəsini verəcəyinə inam ifadə olunur.  

Daha sonra Qafqaz Müsəlmanları İdarəsinin (QMİ) sədri, Şeyxülislam Allahşükür Paşazadə çıxış edib. QMİ sədri müasir dönəmdə özünü islama aid edən radikal dini təriqət və cərəyanların dağıdıcı fəaliyyətilə qarşı-qarşıya qalmağın gerçəklik olduğunu söyləyib. “Görünən odur ki, müsəlman dünyası böyük təhlükə və sonu fəlakətə apara biləcək təxribatlarla üz-üzə qalıb”, - deyə QMİ sədri islam ölkələrində baş verən proseslərə mövqe ifadə edib. 

A.Paşazadə Azərbaycanın erməni terroruna məruz qaldığı üçün İraqdakı qətliyamları, Suriyadakı qardaş qırğınlarını, İŞİD-in törətdiyi rəzalətləri, Qüdsdəki hərbi cinayətləri və terror aktlarını qətiyyətlə pislədiyini vurğulayıb. QMİ sədri bir sıra dünya ölkələrinin “erməni soyqırımı”nı tanımasını Xocalı qətliyamını görməzlikdən gəlməsi, buna göz yumması kimi dəyərləndirib.

A.Paşazadə qloballaşma və inteqrasiya proseslərinin geniş vüsət aldığı dünyada, həm də ziddiyyətli proseslər, ayrı-ayrı bölgələrdə milli-mədəni, mənəvi-siyasi qarşıdurmalar, islamofobiya və ksenofobiya halları da müşahidə olunmasına diqqət çəkib. QMİ rəhbəri etnik-siyasi qarşıdurmaları, terrorizmi, separatçılıq və dini radikalizmi bəşər sivilizasiyasını təhdid edən hadisələr kimi dəyərləndirib. O, məhz belə bir məqamda mədəniyyətlərarası dialoqa, elm və din xadimlərinin birgə fəaliyyətinə ciddi ehtiyac yarandığını nəzərə çatdırıb. “Dindən siyasi məqsədlər üçün istifadəyə, ekstremist təmayüllərə qarşı mübarizənin önündə ilk növbədə nüfuzlu siyasi və dini liderlər, ziyalılar, güclü təsir imkanlarına malik olan informasiya vasitələri durmalıdır”, deyə bu bəlaya qarşı mübarizə formatını göstərib.

A.Paşazadə konfransın əsas məqsədi kimi bütün dünyaya dinlə elmin vəhdətinin vacibliyini bəyan etmək olduğunu bildirib. QMİ sədri “qloballaşma” adı ilə insanların həyatına bir sıra problemlər daxil olduğunu iddia edib. Onun sözlərinə görə, dindarlar bu problemlərin səbəbi kimi ilahi qanunların pozulmasını,  bəşərin mənəvi dəyərlərdən uzaqlaşaraq  fəlakətlərə yaxınlaşmasıdır. A.Paşazadə dünyada sülhün bərqərar olması, cəmiyyətdə mənəvi-əxlaqi bazisin yaradılması, milli-mənəvi dəyərlərin qorunmasında ziyalıların, elm və din xadimlərinin səylərinin birləşdirilməsini önəmli şərtlər adalandırıb. İslam dinin elmə yüksək qiymət verdiyini deyən A.Paşazadə bu mənada alimlərin peyğəmbərlərin varisi olması haqda Məhəmməd peyğəmbər (ə.s)-ın hədisinə isnad edir.

QMİ sədri son olaraq bu gün yaradılan şərait və imkanlardan din və elmin yararlanaraq bir-birinə arxa-dayaq olmasını, gələcək nəslin düzgün tərbiyəsi və maariflənməsinə yardım etməli olmasını önə çəkib. A.Paşazadə bu konfransı Milli Elmlər Akademiyası ilə aparılan işlərin ilk müsbət göstəricisi adalandırıb.

Konfransa Türkiyə, İran, Küveyt, Səudiyyə Ərəbistanı Krallığı, Mərakeş, Finlandiya, Almaniya, Avstriya, İsveç, Rusiya, Gürcüstan, Qazaxıstan, Özbəkistan, Qırğızıstan və Tacikistandan gəlmiş hökumət üzvləri, tanınmış elm və din xadimləri, o cümlədən, Azərbaycandakı xristian və yəhudi icmalarının nümayəndələri qatılıblar.

Konfrans aprelin 17-də işini başa vurmağı nəızərdə tutur. -05B-