Apellyasiya Məhkəməsi jurnalistin vəkillə telefon danışıqlarına qadağa qoyulmasına dair şikayətini təmin etməyib

Yanvarın 17-də Bakı Apellyasiya Məhkəməsi vəkillə telefon danışığı hüququnun məhdudlaşdırılması ilə bağlı jurnalist Sevinc Vaqifqızının şikayətini təmin etməyib.  Dinləmələr jurnalistin vəkilinin iştirakı olmadan keçirilib.

“Yanvarın 15-də, ötən məhkəmə iclasında bizim müdafiə hüququmuz təmin olunmayıb. Sevinc Vaqifqızı şüşə qəfəsdə saxlanılır. Mən onunla məsləhətləşə bilmirəm. Bu səbəbdən də biz bugünkü məhkəmə iclasında iştirak etmədik. Hakim heyəti dövlət hesabına vəkil təyin edib. Onun iştirakı ilə məhkəmə iclası davam etdirilib və şikayət təmin edilməyib”, - vəkil Elçin Sadıqov Turan-a bildirib.

Müdafiə tərəfi Penitensiar Xidmətin istintaq təcridxanasının Vaqifqızının vəkillə telefon danışıqlarına qadağa qoymasını qanunsuz hesab edir.

Penitensiar Xidmətdən şərh almaq mümkün olmayıb.

* Abzas Media nəşrinin direktoru Sevinc Vaqifqızı ötən il noyabrın 20-dən bu onlayn nəşrin bir neçə əməkdaşı ilə birlikdə həbsdədir. Onlar valyuta qaçaqmalçılığında ittiham olunurlar. Jurnalistlər ittihamları rədd edirlər və onlara qarşı cinayət təqiblərini Abstras Media-nın antikorrupsiya araşdırmaları ilə əlaqələndirirlər.