Apellyasiya məhkəməsi NİDA fəalını həbsdə saxladı

Bu gün Bakı Apellyasiya Məhkəməsi NİDA hərəkatının fəalı Məmməd Əzizovun həbs müddətinin 2 ay uzadılması ilə bağlı şikayətini təmin etməyib.

Bu barədə Turan-a vəkil Fariz Namazlı bildirib. O, məhkəmənin qərarını əsassız adlandırıb, belə ki, heç bir istintaq hərəkəti aparılmır. Bundan başqa, Əzizovu həbsdə saxlamaq zərurəti yoxdur, çünki o, şahidlərə təzyiq göstərmək iqtidarında deyil. O, həmçinin istintaqdan yayınmayacaq, çünki özünü təqsirsiz hesab edir.

Vəkilin sözlərinə görə, işə mahiyyəti üzrə baxılması dekabrda başlaya bilər.

Martın 9-da telekanallar həbs edilmiş NİDA fəalları Məmməd Əzizov, Bəxtiyar Quliyev və Şahin Novruzlunun dindirilməsi zamanı çəkilmiş kadrları nümayiş etdiriblər. Bu zaman gənclərin martın 10-da etiraz aksiyasında polisə qarşı “Molotov kokteyli”ndən istifadə etmək və aksiya iştirakçılarına narkotik paylamaq niyyətində olduqları iddia olunub.

Sonradan Əzizov MTN və AzTV-yə qarşı məhkəmə iddiası qaldırıb. Lakin Səbail rayon məhkəməsi iddianı icraata qəbul etməkdən imtina edib. Müdafiə tərəfi apellyasiya şikayəti verib.

Hazırda 7 NİDA fəalı həbsdədir.

Amnesty International məhbusları “vicdan məhbusu” kimi tanıyıb. -16/06B-