ATƏT Qarabağda insidentlərin araşdırılması mexanizmi üzərində işləyir?

Vyanada Qarabağ münaqişəsi zonasında insidentlərin araşdırılması mexanizmlərinin formalaşdırılması üzrə iş davam etdirilir, bu barədə çərşənbə axşamı Fransanın Ermənistandakı səfiri Jan-Fransua Şarpantye bildirib.

Ermənistan və Azərbaycan prezidentlərinin son görüşünün yekunları haqqında bəyanatda bu mexanizmlər haqqında danışılmırsa, bu, heç nə demək deyil.

“Mənim aldığım məlumata görə, Vyanada bu mexanizmlərin müəyyən edilməsi üzrə fəal işlər aparılır. Mənim bu məsələyə məhəl qoyulmadığı barədə məlumatım yoxdur”, deyə səfir mətbuat konfransında bildirib.

Şarpantye xatırladıb ki, mexanizmlərin müəyyən edilməsi məsələsi prezidentlərin Vyana görüşündə mühüm məsələ idi, Fransa isə bu məsələni dəstəkləyir və onun təşviqinə yardım etmək üçün əlindən gələni edir.

Qarabağ münaqişəsi zonasında nəzarət və insidentlərin araşdırılması mexanizmlərinin müəyyən edilməsi etimad səviyyəsinin artırılmasına səbəb olacaq və bu ilin aprel hadisələrinə “işıq salacaq”, deyə səfir bildirib.

Bu mexanizmlər ilk növbədə ATƏT-in hazırki sədrinin şəxsi nümayəndəsi ofisinin səlahiyyətlərinin genişləndirilməsini və imkanlarının artırılmasını nəzərdə tutacaq, həmçinin bütün təmas xətti boyunca mexanizmlər yerləşdiriləcək.

“Mexanizmlər” termininə aydınlıq gətirən Şarpantye deyib ki, söhbət “insanların yerləşdirilməsindən gedir. “Söhbət sülhməramlıların yerləşdirilməsindən deyil, monitorinq kontingentinin xeyli artırılmasından gedir”, deyən səfir ətraflı açıqlama verməyib.

Azərbaycan XİN hələlik Fransa səfirinin bəyanatını şərh etməyib.

ATƏT-in Minsk Qrupunun həmsədrləri də hələlik bu məsələ ilə bağlı heç bir bəyanat verməyiblər. -02D-