Avropa Günü münasibətilə fleşmob

Azərbaycan Avropa Hərəkatı (AAH) Avropü Günü münasibətilə bulvarda “fleşmob” formasında aksiya keçirib. Nümayiş “Azneft” meydanının qarşısında olub.

150-yə yaxın gənc bir cərgədə arxası dənizə, üzü şəhərə doğru düzülüb. Onlar əllərində göy rənglə boyanmış şarlar, üzərində Avropa dəyərlərini – azad seçkilər, insan hüquqları, mədəniyyət müxtəlifliyi, toplaşma və ifadə azadlığı, demokratiya, şəffaflıq, mülkiyyət toxunulmazlığı və digər dəyərləri əks etdirən plakatlar qaldırıblar.

AAH baş katibi Aygül Cəfərova Turan-ın müxbiri ilə söhbətində bildirib ki, nümayiş Bakı sakinlərinin Avropa dəyərlərinə diqqətini yönəltmək məqsədilə keçirilir. 

Aksiya 10 dəqiqə davam edib. Tədbir başa çatdıqdan sonra iştirakçılar bulvarda kiçik uşaqlara şar paylayıblar. 

Polis baş verənləri müşahidə etsə, müdaxilə etməyib.

9 may Aİ ölkələrində Avropa Günü kimi qeyd olunur. Avropa Günü bayramının əsası kimi 1950-ci il mayın 9-u götürülüb. Belə ki, həmin gün Avropa kömür və polad birliyinin yaradılması elan olunub və sonradan bu, indiki Avropa İttifaqına çevrilib.

AAH Brüsseldə yerləşən Beynəlxalq Avropa Hərəkatının (BAH) Azərbaycan bölməsidir. BAH 1948-ci ildə Uinston Çörçill və Avropanın digər siyasi xadimləri tərəfindən yaradılıb.  BAH sülh, demokratiya, azadlıq, həmrəylik, Avrointeqrasiya prosesini təbliğ edir. 16/06C