Yol qəzasında günahkar olanların əvəzinə müsavatçılar həbs olunub

 Müsavat Partiyası Xaçmaz rayon təşkilatının üç fəalı ötən gecə polis tərəfindən saxlanılıb. Səhər Xaçmaz Rayon Məhkəməsi təşkilatın rəhbəri Heybət Əmrahı, fəallar Fikrət Əliyev və Ələddin Mirzəyevi 10 sutka həbs edib.  Bu barədə Turan-a Müsavat Partiyası sədrinin müavini Gülağa Aslanlı məlumat verib. 

Onun sözlərinə görə, partiya üzvləri dünən Xudatda baş vermiş aksiya ilə əlaqədar həbs olunublar. Aksiya sərhədçilərin və yerli sakinlərin iştirakı ilə törədilmiş yol-nəqliyyat qəzasından sonra baş verib. Avtomobillərin toqquşması zamanı hərbçilər yerli sakini təhqir ediblər ki, bu da adamlar arasında narazılığa səbəb olub. 

Bundan ötrü rayon başçısı Şəmsəddin Xanbabayev və sərhəd qoşunları komandanı Xudata getməli olub. 

Gecə polis yaşlı müəllimə Malina Balaxanovanı saxlayıb, lakin səhər buraxıblar. Bundan əlavə, polis Müsavat Partiyasının Xaçmaz rayon təşkilatının keçmiş rəhbəri Ramazan Əliyevi axtarır. G.Aslanlı həbs edilənlərin günahsız olduqlarını bildirib. Onlar yalnız sosial şəbəkələrdəki xəbərləri paylaşıblar. Hakimiyyət həbslər aparmaqla məsuliyyəti Müsavat Partiyasının üzərinə qoymaq istəyir.

Yerli hüquq-mühafizə orqanlarındakı mənbə həbsləri Turan-a təsdiqləyib və bildirib ki, sözügedən şəxslər “ictimai yerdə özlərini apara bilmədiklərinə görə” həbs olunublar. Yerli sakinlərdən biri də 10 sutka həbs cəzası alıb.

Mənbənin məlumatına görə, yol qəzasını törədən hərbçilərin hərəkətləri Sumqayıt Hərbi Prokurorluğu tərəfindən araşdırılır. 

Sərhəd Xidmətinin mətbuat xidmətindən şərh almaq mümkün olmayıb.—06D-

***

Cümə axşamı Xudatda sərhədçilərlə mülki şəxslərin iştirakı ilə baş vermiş yol-nəqliyyat qəzası yerli əhali arasında narazılığa səbəb olub.

Yerli mülki fəalların məlumatına görə, mayın 9-da Xudatda Sərhəd Qoşunları hissəsinin komandirinin avtomobili yerli sakin Rafiq Hüseynovun “VAZ 2104” avtomobili ilə toqquşub.

Komandirin maşınından çıxan hərbi formalı şəxs yerli sakinin ünvanına təhqiramiz ifadələr işlədib. 

Sərhədçilərin hərəkətlərindən qəzəblənən bir qrup sakin yerli polisə gələrək günahkarların cəzalandırılmasını tələb edib. Eyni zamanda hissə komandirinin özünün avtomobildə olub-olmaması ilə bağlı ziddiyyətli məlumatlar yayılır. Bəzi xəbərlərə görə, avtomobili komandir özü idarə edib, digər xəbərlərə görə, o maşında olmayıb.

Şəhər polis bölməsinin rəisi Elçin Rəcəbov obyektiv araşdırma aparılacağını vəd etdikdən sonra adamlar dağılışıb. O, avtomobili komandirin idarə etməsi barədə məlumatı təkzib edib.

Xatırladaq ki, yanvarın 23-də baş vermiş analoji insident İsmayıllı iğtişaşlarına səbəb olub. Belə ki, “Çıraq” otelinin meneceri yol qəzası törədərək yerli sakinləri təhqir edib. Buna cavab olaraq sakinlər oteli yandırıblar, rayonun o zamankı icra başçısı Nizami Ələkbərovun villasına hücum ediblər. —06D--