AXCP gənc fəalı T.Əlisoy 20 sutka həbs cəzası alıb (YENİLƏNİB)

AXCP gənc fəalı Türkel Əlisoy polisə müqavimət maddəsi ilə inzibati qaydada 20 sutka həbs cəzası alıb.

O, dünən saxlanılıb, bu gün isə məhkəmə onun həbsi haqqında qərar qəbul edib.

AXCP-də hesab edirlər ki, gənc fəal fevralın 26-da Xocalı abidəsinin ziyarətindən sonra yürüşdə iştirak etdiyinə görə təqib olunur.

AXCP-nin məlumatına görə, bundan əvvəl partiyanın 5 fəalı bu yürüşdə iştiraka görə 15-20 gün müddətinə həbs edilib. -16D-
 

2014 Mart 06 (Cümə axşamı) 12:59:02

Artıq bir gündür ki, AXCP  Gənclər Komitəsinin İdarə Heyətinin üzvü Türkel Əlisoydan xəbər yoxdur. O, dünən axşamdan yoxa çıxıb, mobil telefonu söndürülüb. Gənc fəalın qardaşının sözlərinə görə, səhər onların evinə mülki geyimli iki şəxs gələrək T.Əlisoyun harada olması ilə maraqlanıblar. Türkelin ailəsi onun yoxa çıxması ilə bağlı Xətai rayon 35-ci polis bölməsinə ərizə verib.

AXCP hesab edir ki, gənc fəal siyasi motivlərlə təqib olunur.

DİN mətbuat xidmətindən hər hansı məlumat almaq mümkün olmayıb.

Qeyd edək ki, bundan əvvəl AXCP-nin beş üzvünə 15-20 sutka inzibati həbs cəzası verilib.  -16D04-