Azadlığa çıxmış vicdan məhbusları demokratiya uğrunda mübarizəni davam etdirəcəklər

“Həbs olunduğum gün bəyan etmişdim ki, həbsim siyasi motivlidir. Həbsdən azad ediləcəyimin də siyasi motivli olacağını gözləyirdim”, - Müsavat Partiyasının Mərkəzi İcra Aparatının rəhbəri Arif Hacılı həbsdən azad edilməyini belə qiymətləndirir. 

O hesab edir ki, həbsdən azad edilməsi mütləq hadisədir: “Bütün siyasi məhbusların, o cümlədən Şahin Həsənlinin, Vidadi İsgəndərlinin,  jurnalist Əvəz Zeynallı azadlığa buraxılmaması təəssüf doğurur”.

AXCP fəalı Sahib Kərimov deyib ki, azadlığını fundamental azadlıqlar uğrunda mübarizədə itirib: “Mən indi fərdi azadlığıma qovuşdum, amma cəmiyyətin azadlığı uğrunda mübarizəmi davam etdirəcəyəm”. 

Müsavat Gənclər Təşkilatının sədri Tural Abbaslı bildirib ki, bundan sonra da mübarizəsini davam etdirəcək. “Biz 14 saylı cəzaçəkmə müəssisəsində saxlanan 6 gənc hazırda da  bir yerdəyik. İlk öncə bizimlə bir yerdə saxlanan Şahin Həsənli və Vidadi İsgəndərlinin azadlığa buraxılmamasından təəssüflənirik. Ümid edirik ki, Azərbaycan hakimiyyəti gərəksiz inadından əl çəkərək onları da azadlığa buraxacaq”, - bildirib.

O, tam bəraət uğrunda mübarizəsini davam etdirəcəyini qeyd edib: “Avropa Məhkəməsinədək bəraət üçün müraciət edəcəyəm”. 

T.Abbaslı müxalifətçilərin demokratiya uğrunda mübarizəni həbsxana divarları arasında da davam etdirdiyini deyib: “Biz həbsxanada da davranışımızla mübarizəmizi davam etdirirdik. Həbsə müsavatçı kimi salındıq, müsavatçı kimi azad edildik. Bundan sonra da partiyanın qərarlarına uyğun olaraq mübarizəmizi davam etdirəcəyik”, - o vurğulayıb. -03B-