Azərbaycan ABŞ-da lobbiçilərə xərcləri artırır

Vaşinqtonda siyasətin formalaşdırılmasına təsir vasitələrinin axtarışı Azərbaycan hökumətini Vaşinqton lobbiçilərinə xərclərin artırılmasına vadar edir.

Azərbaycan ABŞ-da lobbiçilərə ən çox vəsait xərcləyən 10 ölkə arasındadır, bu barədə Turan-ın Vaşinqton müxbirinə rəsmi mənbələr bildirib.

Azərbaycan səfirliyi, Los Ancelesdəki konsulluq, SOCAR Dövlət Neft Şirkəti, habelə diaspora təşkilatının rəhbəri və eyni zamanda oliqarxın oğlu Vaşinqtonda (Podesta Group, Patton Boggs, Bob Lawrence & Associates,  Jefferson Waterman International) və bölgələrdə ( Roberti + White, Tool Shed Group, The Potomac Square Group and Fabiani& Company) ən az 8 nüfuzlu lobbiçi qrupu tutub. Amerika hökumətinin məlumatına görə, ötən il onlara ödənilən ümumi məbləğ minimum 2,3 mln. dollar təşkil edib.

Pul vəsaitlərinin böyük hissəsi yanvar-iyul ayları ərzində, qalan hissəsi isə 15 oktyabr-12 dekabr tarixləri arasında köçürülüb. Yəni Azərbaycan hökuməti İlham Əliyevin üçüncü dəfə prezident vəzifəsində qalması ilə nəticələnən qeyri-demokratik prezident seçkilərinə görə sərt beynəlxalq tənqidə məruz qaldığı bir vaxtda.

Maraqlıdır ki, Gürcüstan da 2,3 mln. dollar xərcləyərək, lobbiçilərə ödəniş edən ölkələr siyahısında 9-cu yeri tutub.

Onluğun qalan üzvləri BƏƏ (14,2 mln.), Almaniya (12 mln.), Kanada (11.2 mln.), Səudiyyə Ərəbistanı (11 mln.), Meksika (6 mln.), Mərakeş (4 mln.), Cənubi Koreya (3.9 mln.) və Bosniyadır (2,4 mln.). Lobbiçilik fəaliyyətinə xərclənən vəsaitlərin açıqlanmasını tələb edən ABŞ Ədliyyə Nazirliyinin məlumatları belədir.

Maraqlıdır ki, Rusiya siyahıda 40-cı yeri tutur. Ermənistan faktiki olaraq, Vaşinqtonda lobbiçi tutmur. Bu rolu bir neçə nüfuzlu erməni diaspor qrupu yerinə yetirir.

Bu qrupların fəaliyyətinin sonuncu nəticəsi Kaliforniya ştatının Dağlıq Qarabağın müstəqilliyinin tanınması haqqında akt qəbul etməsi olub. Kaliforniya Massaçusets, Rod Aylend, Men və Luizianadan sonra belə akt qəbul etmiş beşinci ştat oldu.

Öz növbəsində, Azərbaycan tərəfin vəsaitləri əsasən bu, bahalı süfrələrlə müşaiyət olunan konqresmenlərlə görüşlərə, Amerika dövlət məmurlarının və qanunvericilərinin Bakıya səfərlərinə, habelə yerli ekspertlərin iştirakı ilə debatlara xərclənir.

Öz növbəsində, lobbiçi təşkilatlardan heç biri Turan agentliyinə bu məsələ üzrə fəaliyyətinin mahiyyətini açıqlamaq istəməyib. Azərbaycan səfirliyindən də şərh almaq mümkün olmayıb.

Eyni zamanda, bu fəaliyyətin mahiyyəti barədə yaxşı məlumatı olan keçmiş Vaşinton lobbiçilərindən biri anonim qalmaq şərtilə Turan-a bildirib ki, Azərbaycan tərəfin xərclərinin artmasına baxmayaraq, xüsusən ayın əvvəlində keçirilən Amerika-Azərbaycan konfransı bütün əvvəlki tədbirlərlə müqayisədə səmərəsiz olub.

Tədbirdə konqresin cəmi bir neçə rəsmi nümayəndəsi iştirak edib. Eyni zamanda, Azərbaycan tərəfi beynəlxalq mətbuatla ölkənin aktual problemləri mövzusunda ünsiyyətdə maraqlı olmayıb. Bu zaman rəsmi Bakının siyasətini tənqid edən bir neçə beynəlxalq analitik tədbirə dəvət edilməyib. -25В-