Azərbaycan Afrindəki hərbi əməliyyatı anlayışla qarşılayıb

Bakı/21.01.18/Turan: Rəsmi Bakı Türkiyənin terror təhlükəsi ilə bağlı narahatlığını anlayır və onun həyata keçirdiyi "Zeytun budağı" hərbi əməliyyatını anlayışla qarşılayır, bu barədə Azərbaycan XİN-in rəsmi nümayəndəsi Hikmət Hacıyev Ankaranın Suriyanın Afrin şəhərindəki əməliyyatını şərh edərkən bildirib.

"Azərbaycan terrorizmdən əziyyət çəkmiş dövlət kimi, terrorizmin bütün forma və təzahürlərini qəti şəkildə pisləyir və terrorizmə qarşı mübarizədə beynəlxalq ictimaiyyətin səylərini dəstəkləyir. Beynəlxalq və regional sülh və təhlükəsizliyin təmin edilməsi üçün terror təhlükəsinin kökünün kəsilməsi xüsusilə vacibdir", deyə yanvarın 21-də Hacıyev KİV-in sorğusuna cavabda bildirib.

O qeyd edir ki, "Türkiyə hökuməti tərəfindən bəyan edildiyi kimi, Türkiyə Silahlı Qüvvələri tərəfindən həyata keçirilən "Zeytun Budağı" əməliyyatının məqsədi Türkiyənin sərhədlərinin təhlükəsizliyini təmin etmək, bölgədəki terror təhlükəsini zərərsizləşdirilmək və ərazidə yaşayan mülki insanları terror hücumları və təhdidlərindən qorunmaq məqsədi daşıyır".

"Türkiyə dəfələrlə terror hücumlarına məruz qalıb və nəticədə çoxsaylı günahsız insanlar həlak olub. Azərbaycan Türkiyənin terror təhdidinə qarşı əsaslı təhlükəsizlik narahatlıqlarını tam şəkildə anlayır.

Biz qardaş Türkiyə və Türkiyə xalqının bir daha heç zaman xain terror hücumlarına məruz qalmamasını arzu edir və diləyirik", deyə Hacıyev bildirib.

Türkiyə SQ Baş Qərargahı şənbə günü Suriyanın şimal-qərbində Afrin bölgəsində kürd birləşmələrinə qarşı "Zeytun Budağı" əməliyyatına başladığını elan edib. Kürd silahlı birləşmələri bu sərhəd bölgəsindən Türkiyəyə terror hücumları üçün istifadə edir. -06D-