Azərbaycan Krımda referenduma müşahidəçi göndərəcəkmi?

RF Federasiya Şurasının Beynəlxalq Komitəsinin sədri Mixail Margelov İttifaq dövləti parlamentarilərinin Krımın statusu üzrə referendumda MDB Parlamentlərarası Assambleyası müşahidəçilər missiyasında iştirakının tərəfdarıdır, xəbəri RİA Novosti yayıb.

Çərşənbə günü Federasiya Şurasının plenar iclasında Ukraynadakı vəziyyətin müzakirəsi zamanı senatorlar MDB meydanından istifadə etməyi təklif ediblər. Margelov Krımda müşahidə missiyası üçün belarus parlamentarilərin dəvət edilməsini təklif edib.

“Missiyaların sayı məhdud deyil, biz referendumun yüksək demokratik standartlara uyğun keçirilməsində maraqlıyıq”, deyə Margelov bildirib.

Senator həmçinin bildirib ki, beynəlxalq komitə müntəzəm olaraq geniş iclaslar formatında respublikadakı vəziyyəti müzakirə etməyi planlaşdırır. O, həmçinin qeyd edib ki, artıq Krımın statusu üzrə 30 mart referendumunun monitorinqi üçün MDB Parlamentlərarası Assambleyası ilə birgə müşahidəçilər missiyasının formalaşdırılması başlayıb.

Turan Milli Məclisdən referendumun monitorinqində Azərbaycan müşahidəçilərinin iştirakı ehtimalı haqqında şərh almağa müvəffəq olmayıb.

Öz növbəsində, Azərbaycan MSK-nın sədr müavini Natiq Məmmədov Turan-ın referendumun monitorinqi üçün dəvət daxil olub-olmaması haqqında sualına cavabda deyib: “Belə bir müraciətin daxil olması haqqında məlumatım yoxdur”.

Belə bir müraciət olarsa, MSK müşahidəçi göndərəcək? Bu suala cavabda Məmmədov deyib ki, müraciət olmadan əvvəlcədən qəti nə isə demək çətindir.

Bununla belə, Məmmədov bildirib ki, “ümumiyyətlə Azərbaycan MSK digər mərkəzi seçki komissiyaları ilə əməkdaşlıq edir”. -06D-