Avropa İttifaqı Ukraynaya 11 mlrd. avro ayıracaq

Avropa İttifaqı Ukraynaya maliyyə yardımı göstərməyə hazırdır, bu barədə Brüsseldə keçirilən brifinqdə Avropa Komissiyasının rəhbəri Joze Manuel Barrozu bildirib.

“Bu gün Avropa Komissiyası Ukraynaya maliyyə yardımı paketini müəyyən edib, buna əsasən ölkə bir neçə il ərzində 11 mlrd. avro ala biləcək”, deyə o açıqlama verib.

Barrozu bu vəsaitin həm Avropa İttifaqının büdcəsindən, həm də Avropa maliyyə qurumları tərəfindən ayrılacağını deyib.

Dünən energetika üzrə Avropa komissarı Günter Ettinger bəyan edib ki, Avropa İttifaqı Ukraynaya Rusiya qazı üçün olan borclarını ödəməyə və energetika sektorunda islahatlar aparmağa kömək etməyə hazırdır.

Ukraynanın baş naziri Arseni Yatsenyukun sözlərinə görə, martın 4-nə ölkənin Rusiyaya ümumi borcu 2 mlrd. dollar təşkil edir.

Bir müddət əvvəl Ukraynanın Beynəlxalq Valyuta Fondundan maliyyə yardımının ilk hissəsi kimi 3 mlrd. dollar almağa ümid etdiyi bildirilib. BVF nümayəndə heyəti artıq Kiyevə gedib. Martın 4-dən 14-nə qədər fond nümayəndələri Ukrayna iqtisadiyyatına maliyyə yardımı ayrılması zərurətini qiymətləndirəcəklər.

Yatsenyukun sözlərinə görə, Ukraynanın nazirlər kabineti kredit almaq üçün BVF-nin bütün şərtlərini yerinə yetirməyə hazırdr. “Hökumət fondun bütün şərtlərini yerinə yetirəcək, çünki başqa çıxış yolu yoxdur”, deyə baş nazir qeyd edib. -02D-