Azərbaycan Prezidentinin mətbuat katibi Aşqabadda İlham Əliyev və Nikol Paşinyan arasında təmas barədə informasiyanı şərh edib (YENİLƏNİB)

Bakı/12.10.19/Turan: Azərbaycan Prezidentinin mətbuat katibi Azər Qasımov MDB Dövlət Başçıları Şurasının Aşqabadda keçirilən iclası çərçivəsində Prezident İlham Əliyev və Ermənistanın baş naziri Nikol Paşinyan arasında təmas barədə informasiyanı "Day.az"a şərh edib.

- Ermənistan baş nazirinin mətbuat katibi informasiya şəbəkələrində Aşqabadda iclas çərçivəsində Prezident İlham Əliyev və Ermənistanın baş naziri Nikol Paşinyan arasında təmas barədə informasiya yayıb. Bununla əlaqədar nə deyə bilərsiniz?

- İclasda iştirak edən dövlət başçılarının şərəfinə təşkil olunmuş rəsmi nahar zamanı protokol qaydalarına uyğun olaraq əlifba sırası ilə Azərbaycan Prezidenti İlham Əliyev və Ermənistanın baş naziri Nikol Paşinyan yanaşı əyləşiblər. Təbii ki, orada təmas olub. Söhbət zamanı Ermənistan-Azərbaycan Dağlıq Qarabağ münaqişəsi müzakirə olunub.-0-

* * *

2019 Oktyab 12 (Şəmbə) 23:12:42

Kəskin münaqişədən sonra Əliyev və Paşinyan axşam yeməyində 1,5-2 saat söhbət ediblər

Bakı/12.10.19/Turan: Ermənistanın baş naziri Nikol Paşinyan və Azərbaycan prezidenti İlham Əliyev Qarabağ münaqişəsi ilə bağlı hazırki vəziyyəti və gərginliyin azaldılması imkanlarını müzakirə ediblər. Bu barədə "Armenpress"ə baş nazirin mətbuat katibi Vladimir Karapetyan bildirib.

"MDB-nin 11 oktyabr tarixli Aşqabad sammitinin yekunlarına həsr olunmuş rəsmi axşam yeməyində yerlər əlifba qaydasında ayrılıb, Əliyev və Paşinyan yan-yana oturublar və söhbət ediblər. Söhbət əsasən Qarabağ münaqişəsinin nizamlanması sahəsində cari vəziyyətə, gərginliyin azaldılması imkanlarına və gələcək addımlara həsr olunub", deyə Karapetyan bildirib. Onun sözlərinə görə, söhbət 1,5-2 saat davam edib.

Karapetyanın sözlərinə görə, Ermənistan baş naziri Ermənistan, Qarabağ və Azərbaycan üçün məqbul ola biləcək münaqişənin nizamlanması düsturunu yenidən təkrar edib. Əliyevin buna nə cavab verdiyini mətbuat katibi açıqlamayıb.

Qeyd edək ki, rəsmi Bakı hələlik Əliyevin Paşinyanla söhbəti haqqında məlumat verməyib. -02D-