Azərbaycan və Böyük Britaniya iqtisadi əlaqələri müzakirə edilib

“Birləşmiş Krallıqdan Azərbaycana 30 milyard dollardan çox investisiya yatırılıb. Bu, həqiqətən də çoxdur. Bu, bizim inkişafımıza kömək edib. Bu, bizə nəinki təkcə neft və qaz sənayesini inkişaf etdirməyə kömək edir, eyni zamanda ümumi inkişafımıza kömək edir”, - Azərbaycan prezidenti İlham Əliyev mayın 21-də Böyük Britaniyanın ixracat naziri Qraham Stüart ilə görüşündə deyib.

İlham Əliyev bildirib ki, BP 30 il ərzində və ən azı bundan sonra da 30 il ərzində Azərbaycanın strateji tərəfdaşıdır. “Çünki yeni perspektivlər var, yeni müqavilələr imzalanıb. Həm BP, həm də Azərbaycan bərpa olunan enerji mənbələri üzərində fəal çalışırlar”.

Prezident deyib ki, işğaldan azad olunmuş ərazilərin yenidən qurulması və bərpası istiqamətində ilk xarici şirkətlər sırasında Britaniya şirkətləri də dəvət edilib.

“Artıq şəhərlərin baş planları hazırlanıb və biz çox fəal fazadayıq. Biz dost ölkə olan Britaniya şirkətləri ilə əməkdaşlığı genişləndirmək istəyirik”, Əliyev qeyd edib.

Böyük Britaniyanın ixracat naziri Qraham Stüart deyib ki, Birləşmiş Krallıq Azərbaycanın uzunmüddətli tərəfdaşıdır və ölkənin suverenliyini, müstəqilliyini müdafiə edir: “Bizi həmçinin bir çox məsələlər maraqlandırır. Lakin mən bunlardan ikisini seçərdim. Birincisi, Birləşmiş Krallığın da sadiq olduğu, sizin daha da yaşıl və dayanıqlı gələcəyə dair baxışınızdır. Hesab edirəm ki, Azərbaycanın nəinki təkcə uğurlu neft və qaz iqtisadiyyatına malik olan ölkə, eləcə də, gələcəyi düşünən və uzunmüddətli perspektivdə strateji planlar quran bir ölkə olmasını təmin etmək sizin baxışınıza uyğundur. Çünki gələcək daha da yaşıl olacaq, qlobal investisiyalar bu sahəyə yatırılacaq və münasibətlərimizi dərinləşdirmək üçün fürsət olacaq. Sizin də qeyd etdiyiniz kimi, BP strateji tərəfdaşınızdır, orada böyük imkanlar var”. -03-