Azərbaycan və Türkiyə arasında hökumətlərarası sazişlər imzalanıb

Bakı/31.10.17/Turan:"Bu gün biz təkbətək görüşdə bir çox məsələləri müzakirə etdik. Bir daha görürük ki, Türkiyə-Azərbaycan əlaqələri ən yüksək səviyyədədir, ən yüksək zirvədədir", - Azərbaycan prezidenti İlham Əliyev oktyabrın 31-də Türkiyə prezidenti Rəcəb Tayyib Ərdoğanın iştirakı ilə Azərbaycan-Türkiyə Yüksək Səviyyəli Strateji Əməkdaşlıq Şurasının altıncı iclasındakı çıxışında bildirib.

"Əminəm ki, bu gün geniş tərkibdə müzakirə ediləcək məsələlər də yaxşı nəticələrə gətirib çıxaracaq", - o vurğulayıb.

"Dünən və bu gün keçirdiyimiz görüşlərlə birlikdə Türkiyə ilə Azərbaycan arasındakı qardaşlığın, dostluğun necə yüksək səviyyəyə çatdırıldığını xüsusilə sevinc içərisində müşahidə edirik". Bunu isə Türkiyə prezidenti Rəcəb Tayyib Ərdoğan deyib.

O, Bakı-Tbilisi-Qars dəmir yolunun istifadəyə verilməsini, atılan addımların nəticəsini görməyin qürur gətirdiyini söyləyib.

Prezidentlərin görüşünün yekunlarına əsasən altı sənəd imzalanıb:

Azərbaycan və Türkiyə arasında Strateji Əməkdaşlıq Şurasının altıncı iclasının protokolu;

- Azərbaycan Təhsil Nazirliyi və Türkiyə Ali Təhsil Şurası arasında qarşılıqlı anlaşma və əməkdaşlıq haqqında memorandum;

- Təhsil sahəsində əməkdaşlıq haqqında müqavilə;

- Prefensial ticarət haqqında müqavilənin imzalanması üçün qarşılıqlı anlaşma haqqında memorandum;

- Müdafiə sənayesində əməkdaşlıq haqqında müqavilə;

- Yem məhsullarının istehsalı və sertifikatlaşdırılması sahəsində əməkdaşlıq haqqında müqavilə. -05D04-