Azərbaycanda peşəkar gizirlər yetişdirmək üçün üç hərbi kollec yaradılır

Bakı/14.12.23/Turan: Dövlət başçısının sərəncamı ilə peşəkar gizir heyətinin hazırlanması məqsədilə Bakı, Gəncə şəhərlərində və Naxçıvan Muxtar Respublikasında Azərbaycan Respublikası Müdafiə Nazirliyinin strukturuna daxil olan Milli Müdafiə Universitetinin tabeliyində 3 xüsusi təyinatlı hərbi kolleci yaradılır.  Bu barədə ölkə prezidentinin mətbuat xidmətinin məlumatında deyilir. 

2024–2025-ci tədris ilindən başlayaraq təhsil almaq üçün Müdafiə Nazirliyinin strukturuna daxil olan Milli Müdafiə Universitetinin tabeliyindəki ali təhsil müəssisəsinin bakalavriat səviyyəsinə, o cümlədən bakalavriat səviyyəsinin hazırlıq kursuna və hərbi kolleclərə qəbul olunmuş kursantlara 500 manat, hərbi liseylərə qəbul olunmuş kursantlara 300 manat məbləğində birdəfəlik ödəniş ediləcək.

2024–2025-ci tədris ilindən başlayaraq bu təhsil müəssisələrində təhsil alan kursantlar üçün təhsil müddətində aşağıdakı aylıq ödəmələr müəyyən ediləcək:

ali təhsil müəssisəsi üzrə: 150 (yüz əlli) manat məbləğində təqaüd; 200 (iki yüz) manat məbləğində ailə üzvlərinə maddi yardım; 200 (iki yüz) manat məbləğində hesabda yığılan ödəniş; 

hərbi kolleclər üzrə: 100 (yüz) manat məbləğində təqaüd; 200 (iki yüz) manat məbləğində ailə üzvlərinə maddi yardım; 150 (yüz əlli) manat məbləğində hesabda yığılan ödəniş;

hərbi liseylər üzrə: 50 (əlli) manat məbləğində təqaüd; 100 (yüz) manat məbləğində ailə üzvlərinə maddi yardım; 100 (yüz) manat məbləğində hesabda yığılan ödəniş.

2024–2025-ci tədris ilindən başlayaraq ali təhsil müəssisəsinə və hərbi kolleclərə daxil olan kursantlar həmin təhsil müəssisələrindən məzun olaraq Azərbaycan Ordusunda 5 təqvim ili zabit və ya gizir kimi həqiqi hərbi xidmət keçdikdən sonra yaşayış sahəsinin alınması üçün Azərbaycan Respublikası İpoteka və Kredit Zəmanət Fondunun vəsaiti hesabına güzəştli ipoteka kreditindən istifadə etdikdə müvafiq yaşayış sahəsinin qiymətinin 15 faizədək olan hissəsi dövlət büdcəsinin vəsaiti hesabına maliyyələşdiriləcək.

Hesabda yığılan vəsait ali təhsil müəssisəsini və hərbi kollecləri bitirmiş məzunlara – Azərbaycan Ordusunda müvafiq qaydada zabit və ya gizir kimi vəzifəyə təyin edilərək həmin vəzifənin icrasına başladıqda;

hərbi liseyləri bitirmiş məzunlara – ali təhsil müəssisəsinə qəbul olduqda ödəniləcək.

Hərbi kolleclərin fəaliyyətinin təşkili və zəruri infrastrukturun yaradılması məqsədilə Azərbaycan Respublikasının 2023-cü il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Müdafiə Nazirliyinə ilkin olaraq 2 milyon manat məbləğində vəsait ayrılır. 0