Azərbaycanda ümumilikdə Moskva bəyannaməsini təqdir edirlər

Bakı/23.02.22/Turan:  Azərbaycanlı ekspertlər sosial şəbəkələrdə 22 fevral 2022-ci ildə Moskvada imzalanmış müttəfiqlik münasibətləri haqqında Azərbaycan-Rusiya bəyannaməsinin mətnini təhlil edirlər.

Deputat Rasim Musabəyov Moskva bəyannaməsinin Azərbaycanla Türkiyə arasında müttəfiqlik münasibətlərinə dair  Şuşa bəyannaməsini qüvvədən salması barədə fikirləri "yersiz" adlandırıb.

Vəkil Cavad Cavadov iki dövlətin tərəfdaşın ərazi bütövlüyünə və dövlət sərhədlərinə hörmət etmək və onu tanımaq öhdəliyinə diqqəti yönəldib. "Azərbaycan ərazisi keçmiş Dağlıq Qarabağ ilə birlikdə nəzərdə tutulur. Lakin Rusiya Krım yarımadasını öz ərazisi hesab edir. İndi Bakıdakı rəsmi şəxslər Krımın Ukraynaya məxsusluğuna iddia edə bilməyəcəklər", - Cavadov yazıb.

Nazim Məmmədxanlı Qarabağ məsələsinin tam həll olunmaması, lakin həllində irəliləyişin olması barədə Putinin sözlərini qeyd edib.

Politoloq Fərhad Məmmədov imzalanan bəyannamənin aşağıdakı bəndlərini açıqlayıb:

- 1-ci bənd - ərazi bütövlüyünün dəstəklənməsi;

-2-ci bənd - ölkələrin müstəqil xarici siyasəti;

-5-ci bənd – qarşılıqlı fəaliyyət göstərdikləri regionlar qeyd edilib: Qafqaz və Xəzər;

- 9-cu bənd – Ermənistanla bütün münasibətlər üçtərəfli formatda qəbul edilmiş bəyanatlar əsasında olacaq, başqa heç nə;

- 11-ci bənd пункт – öz ərazilərində digər tərəfin əleyhinə fəaliyyət göstərən adamların və təşkilatların fəaliyyətin yol verməmək ("DQR"in Moskvada ofisi və Araikin Moskva səfərləri?! –görək,  bu bənd  necə həyata keçiriləcək!).

- bənd 40- “tərəflərin ərazisində yaşayan milli azlıqların etnik, dil və mədəni özünəməxsusluğu, milli qanunvericiliyə uyğun olaraq onların nümayəndələrinin ictimai-siyasi, mədəni və sosial-iqtisadi həyatda fəal iştirakına şərait yaratmaq”. Yəni, etnik qruplarla bağlı bütün məsələlər milli qanunvericiliyə uyğun olaraq öz həllini tapır, Fərhad Məmmədov izah edib.

REAL Partiyasının analitiki Natiq Cavadlı bəyannamədə Azərbaycan üçün təhlükəli bəndlərin olmadığını qeyd edir. Bəyannamədə Azərbaycanın antirusiya bloklarında (məsələn, NATO) iştirakını qadağan edən şərt onun xoşuna gəlmir. Eyni zamanda, Cavadlı Moskvanın Azərbaycanın ərazi bütövlüyünü inkar edən təşkilatların (eləcə də Azərbaycan Rusiyaya münasibətdə) öz ərazisində fəaliyyətini qəti şəkildə qadağan etmək öhdəliyini təqdir edir.

“Mətn yaxşıdır, lakin onun icrası suallar doğurur, çünki Moskva faktiki olaraq Qarabağdakı separatçı rejimi tanıyır və onunla əməkdaşlıq edir”, - Natiq Cavadlı fikrini yekunlaşdırıb.

Azərbaycanın rus icması Moskva bəyannaməsi haqda bəyanatını  Turan-a göndərib. Sənəddə deyilir: "İki ölkə arasında diplomatik münasibətlərin qurulmasının 30 illiyi ərəfəsində Azərbaycan və Rusiya münasibətləri qarşılıqlı fəaliyyətin yeni strateji səviyyəsinə çıxaracaq sənəd imzalayıblar. Bu andan Azərbaycan və Rusiya, sadəcə, tərəfdaş deyil, həm də hər iki ölkənin inkişafı və iki xalq üçün, eləcə də regionda sülhün və təhlükəsizliyin təmin edilməsi üçün mühüm əhəmiyyət kəsb edən bir sıra məsələlər üzrə müttəfiqdirlər".—0—