Azərbaycanda  yerləşən xarici səfirliklərin  nümayəndələri   Xocalı soyqırımını anıb

Bakı/27.02.23/Turan: Azərbaycanda yerləşən xarici səfirliklərin nümayəndələri Xocalı soyqırımının 31-ci ildönümü ilə bağlı paylaşım edib. Bir sıra səfirliklər Bakıda yerləşən Xocalı abidəsini ziyarət edərək, gül dəstələri qoyub. Digər səfirliklərin nümayəndələri isə Twitter-də, Facebookda paylaşımlar edib.

Xocalı soyqırımını  yad edənlər arasında ABŞ, Ukrayna, Böyük Britaniya, Fransa,  Türkiyə, Avropa İttfaqı da var.

Belə ki, ABŞ-ın Azərbaycandakı səfiliyi bu soyqırımla bağlı Twitter-də paylaşım edib.

"Biz bu gün azərbaycanlıların matəminə qoşulur və 1992-ci ildə Xocalıda həyatını itirən şəxslərin ailələrinə başsağlığı veririk", deyə paylaşımda qeyd olunub.

Böyük Britaniyanın Azərbaycandakı səfiri Fergus Auld Xocalı soyqırımı qurbanlarının xatirəsinə Bakının Xətai rayonunda ucaldılmış abidəni ziyarət edib.

Avropa İttifaqının Azərbaycandakı nümayəndəliyinin rəhbəri Peter Mixalko da Xocalı faciəsi ilə bağlı paylaşım edib.

"Xocalı faciəsi zamanı ailələrini, dostlarını və evlərini itirən hər kəsə dərin hüznlə başsağlığı verirəm. Biz hamımız bir araya gəlməliyik ki, Cənubi Qafqazda barışıq və uzunmüddətli sülhə nail olmaq üçün hər cür səy göstərək".

Öz növbəsində, Fransanın Azərbaycandakı səfiri Ann Buayon öz Twitter səhifəsində Xocalı soyqırımının ildönümü ilə bağlı paylaşım edib.

"Bu gün Xocalı faciəsini yad edən bütün Azərbaycan xalqının qəminə dərin ehtiramımı bildirmək istəyirəm. Davamlı sülhə dialoq və barışıq yolu ilə nail olmaq lazımdır ki, belə hərəkətlər bir daha baş verməsin", deyə paylaşımda bildirilir.

Ukraynanın Azərbaycandakı səfiri Xocalı soyqırımı ilə bağlı paylaşım edib.

"Bu gündə qəlbimizi təsvirolunmaz ağrı və kədər doldurur. Xocalı faciəsi bəşəriyyət tarixinə ən faciəli səhifələrdən biri kimi həkk olunub.

Kimsə 21-ci əsrdə Avropanın mərkəzində hadisələrin təkrarlana biləcəyini təsəvvür edə bilərdimi?

Rusiyanın bu gün Ukraynaya qarşı etdikləri bir daha sübut edir ki, cəzasızlıq yeni cinayətlər törədir!", deyə o qeyd edib.

Azərbaycanın Hərbi Prokurorluğunun məlumatına görə, 1992-ci il fevralın 25-dən 26-na keçən gecə erməni silahlı birləşmələri keçmiş SSRİ-nin 366-cı motoatıcı alayının köməyi ilə Xocalı şəhərinə hücum edərək dinc əhaliyə divan tutub. Şəhərin 613 sakini, o cümlədən 63 uşaq, 106 qadın xüsusi amansızlıqla qətlə yetirilib, 1275 nəfər əsir və girov götürülərək işgəncələrə məruz qalıb. Onlardan 197-nin taleyi indiyədək məlum deyil. Xocalının 5379 sakini şəhərdən zorakılıqla qovulub, 8 ailə tamamilə məhv edilib, 25 uşaq hər iki valideynini, 130 uşaq isə valideynlərindən birini itirib. 16D