Azərbaycandakı beynəlxalq qurumlar inhisardadırmı?

“QHT-lərlə Əməkdaşlıq Alyansı” cümə axşamı “Siti centr”də “2013-cü il prezident seçkiləri ərəfəsində beynəlxalq qurumlarla yerli QHT-lərin baxış bucaqlarının uyğunlaşdırılması” mövzusunda dəyirmi masa keçirib. 

Qurumun həmsədri Yadigar Məmmədli bu ilki seçkilərdə Alyansın öz üzərinə “vətəndaş cəmiyyətinin səsi” olması missiyasını götürmək istədiyini deyib. Bu il seçki ili olmasına baxmayaraq, cəmiyyətdə süstlük olduğu vurğulanıb. Bu süstlük həm iqtidar, həm də müxalifət düşərgəsinə aid edilib. Bu fonda vətəndaş cəmiyyəti institutlarının fəallaşması vacib hesab olunub. 

Daha sonra seçkilərdə seçici səslərinin sayına münasibətdə iqtidarın, müxalifətin və seçicilərin fərlqi münasibətlər səsləndirməsinə son qoyulması da müzakirə edilib. Buna son qoymaq üçün beynəlxalq qurumların bir qrup QHT ilə işləməsi təcrübəsinə son qoyulmalıdır. Beynəlxalq qurumların yalnız bir qrup QHT ilə işləməsi təcrübəsini Alyansın təmsilçisi Rafael Becanov “bu qurumların inhisara alınması” kimi dəyərləndirib. Amma natiqlərdən heç kim beyənlxlaq qurumları inhisara alan yerli QHT-lərin adlarını açıqlamayıb.

Alyans təmsilçiləri Azərbaycanda seçkilərin monitorinqini ATƏT, Avropa Şurası və Milli Demokratiya İnstitutunun yerli ofislərinin apardığını deyiblər. Buna görə bu qurumları əməkdaşlığa dəvət ediblər. Bu əməkdaşlığın ölkədə seçkilərə dair vahid mövqe formalaşdırmaq baxımından lazımlığı xüsusi vurğulanıb. Bununla yanaşı, Alyans təmsilçiləri bu beynəlxalq qurumları təkcə seçkilərlə bağlı yox, insan haqları, iqtisadi məsələlərlə bağlı birgə əməkdaşlığa da səsləyiblər. Ölkədə iqtidaryönlü, müxalifətyönlü QHT-lər olduğunu deyən Alyans təmsilçiləri özlərini müstəqil qurum adlandırıblar. Beynəlxalq qurumları obyektivlik naminə əməkdaşlığa dəvət etdiklərini iddia ediblər. 

Tədbirin görünən tərəfi bu idi ki, Alyans bütün gücü ilə beynəlxalq təşkilatları hansı yolla olursa-olsun, əməkdaşlığa cəlb etmək istəyir. Alyans təmsilçilərinin bu qurumların hansısa qüvvələrin “inhisarında” olması ilə bağlı bəyanatları isə artıq təzyiq vasitəsi idi. 

Turan-ın müxbirinin beynəlxalq qurum və Alyans təmsilçilərinə üvnanladığı “beynəlxalq qurumlar hansı səbəbdən Alyansla əməkdaşlığa maraq göstərmir və Alyansı etibarlı tərəfdaş sayırmı?” sualı cavabsız qalıb. Belə ki, Alyans təmsilçisi Y.Məmmədli deyib ki, aralarındakı razılığa görə qurum təmsilçiləri heç bir sualı cavablandırmayacaq. Fikrimizcə, bu mövqeyin özünü hələlik əməkdaşlığn sual altında olması kimi dəyərləndirmək olar. 

Xatırladaq ki, QHT-lərə Dövlət Dəstəyi Şurası beyənlxalq qurumların seçki prosesinə qatılması üçün bu yaxınlarda onlara qrant ayrılması haqda qərar çıxarıb. -05C-