Bir neçə gün öncə Ekologiya və Təbii Sərvətlər Nazirliyinin departament direktoru Vaqif Cavadovun müsahibəsində Alpinizm Federasiyasının və şəxsən mənim ünvanıma səsləndirdiyi iradlara və “idman veteranları” adıyla əleyhimizə cəfəng bəyanat imzalayan şəxslərə cavab:
Əvvəlcə Vaqif Cavadovun nəzərinə çatdırmaq istəyirəm ki, Alpinizm Federasiyasını heç kim ələ keçirməyib. Federasiya 50 ildir ki, fəaliyyət göstərir və həmişə də bu federasiyanı alpinizmlə ciddi məşgul olanlar, bu idman növünü sevənlər, bir sözlə, peşəkar idmançılar idarə ediblər və bu günə kimi də idarə edirlər.
Ancaq 2005-ci ildən başlayaraq bu idman növünü alpinizimdən xəbəri olmayan insanlar öz nəzarəti altına almaq istəyirlər. Ancaq buna qanuni yolla nail ola bilmədiklərini görüb, öz vəzifələrindən sui-istifadə edərək, peşəkar alpinistlərə qara yaxmaqla, təhqir etməklə, hədə-qorxu gəlməklə, öz nəzarətləri altında olan mətbuat orqanları vasitəsilə ictimaiyyətə yalan və qərəzli məlumatlar çatdırmaqla məşğuldurlar.
V.Cavadovun dediklərindən belə çıxır ki, Ulu öndərin 90 illik yubileyi ərəvəsində bizim “Heydər zirvəsi”nə yürüş etmək istəyimizə onlar tərəfindən heç bir maneə olmayıb. Onun nəzərinə yenə də çatdırmaq istəyirəm ki, “Heydər zirvəsi”nin yaranma tarixinə baxsın və son 15 il ərzində bu zirvəyə yürüşün proqramı və və təşkilini gözdən keçirsin. Bilsin ki, sözügedən zirvəyə hansı marşrut ilə yürüş təşkil olunur və hansı səviyyədə həyata keçirilir.
O ki qaldı 2013-cü ilə, birincisi, V.Cavadov bizim hər il olduğu kimi, Gənclər və İdman Nazirliyinə ünvanladığımız 11.02.2013 № 02 saylı məktub və əlavə olunmuş proqram ilə müraciət edilmişdir. O müraciətdə müzakirə mövzusu olan məsələlərin hamısı öz əksini tapırdı. Sonradan həmin məktub Sizin nazirliyinizə, həm də Gənclər və İdman Nazirliyi tərəfindən göndərilmişdir. Amma Sizin havadarınızın göstərişi ilə bizim tərtib etdiyimiz proqramı nəzərə almadan, öz istədiyiniz kimi, bizi yürüşdə öz təşkil etdiyiniz tədbirə qatmaq istədiniz. Bu, hansı məntiqə sığır?
Haqqımda işlətdiyiniz “kukla” ifadəsinə gəlincə, öz adınızı mənə qoymaq cəhdinizi də yaxşı başa düşürəm. Kimin “kukla” olduğunu hamı aşkar görür.
Özünüzü yormağınız, özünüzə qalacaq. Bəziləri kimi mənim də öz əqidəmdən dönəcəyimi düşünürsünüzsə, dünəndən yanılmısınız. Bizi tanıyanlar yaxşı bilirlər ki, mən kiməm, İsrafil Aşurlı kimdir və başqaları kimdir.
Siz və himayədarınız alpinistlərdən çox yazıb-yazdırırsınız. Guya alpinizm sizin “mötəbər ideyalarınızla və yorulmaz fəaliyyətinizlə inkişaf edir” və biz də buna “paxıllıq edirik, qoymuruq inkişaf edə”.
Fantastik iddianıza görə guya neçə minlərlə alpinist hazırlayıbsınız. Belədirsə, onda necə ola bilər ki, Respublikada 50 klub yaradan federasiyada bir nəfər də olsun, peşəkar alpinist yoxdur? Azərbaycanda ümumilikdə 10-15 peşəkar alpinist tapmaq mümkündür ki, onlar da Alpinizm Federasiyasındadırlar.
Nəticələrə gəldikdə, FAİREX-in saytında Azərbaycan dağlarında olan alpinist marşrutları, zirvələrin adlarını qeyd edirsiniz: “Heydər zirvəsi”, “Atatürk”, “Olimpiya”, “Şəhidlər”, “ADR”, “Azəri”, “Azadlıq”, “Gənclik”, “Çinqiz Mustafayev”... Bu zirvələrə yürüşlərin olduğundan danışırsınız, ancaq həmin zirvələrin nə zaman, kimlər tərəfindən fəth olunması haqda bir kəlmə belə demirsiniz. Etiraf etmək BÖYÜKLÜKDÜR. Siz isə nəinki etiraf etmirsiniz, əksinə, hələ bizim uğurlarımızı öz adınıza yazmaq qədər KİÇİLİRSİNIZ.
Azərbaycan Alpinizm Federasiyasının üzvləri dünyanın elə bir qitəsinin yüksək zirvəsi yoxdur ki, orada Azərbaycan bayrağını dalğalandırmasınlar. Federasiyamızın üzvləri dünyanın yeddi minlik hündürlüyü olan dağlarından yüksək dərəcəli marşrutlar keçiblər (Sizin isə alpinizmin çətinlik dərəcələrindən xəbəriniz yoxdur). Təkcə Tyan-Şan dağ silsiləsindəki zirvələrdən birinə “Azərbaycan” adının verilməsi kimi tarixi əhəmiyyətli hadisə ilə nəticələnmiş ekspedisiyamız, sizin alpinizm sahəsində gördüyünüz işlərin məcmusu ilə müqayisə oluna bilməz. Sizin üçün əlçatmaz olan bu və ya digər tarixi faktları ört-basdır etmək və ya öz adınıza yazmaq arzularınız ürəyinizdə qalacaq və ədalət öz yerini tapacaq, mən buna əminəm.
V.Cavadovun dünyanın milli parklarına giriş rüsumlarının alınması haqqında dediklərinə gəldikdə, bildirmək istəyirəm ki, permitlə rüsumları qarışdırmasın və yalan məlumat verməsin. Rüsum və permit nədir - bunu peşəkar alpinistlər yaxşı bilir. Permit qiymətlərinə nələr daxildir – bunu onlar daha yaxşı bilirlər.
Vaqif Cavadova daha bir də tövsiyəm budur ki, Azərbaycanda etnik zəmində ayrı-seçkilik salmasın, onsuz da ümumi düşmənlərimiz az deyil.
Özlərini “dağçılıq idman veteranları” adlandıran Valeri Bağırov, Nizami Mursakulov (soy adını yazmağa əlim gəlmir...), Mövlüd Əzizov və İlqar İsrafilovun imzaladıqları “Ayaq altında dolaşıb işimizə mane olmayın” bəyanatına gəldikdə, sadəcə, bunları demək istərdim: nə biz, nə mən ayaq altında qalmışıq. Özlərinə aid olan sözləri başqalarına demək o insanların peşəsi olub və olacaqdır.
Onu da diqqətinizə çatdırım ki, Alpinizm Federasiyasının adını özəlləşdirməyə cəhd edən biz deyilik, sizin himayədarınızdır!
M.Nizami, sən ki Alpinizm Federasiyasının Rəyasət heyətinin üzvüsən və baş katibisən...
V.Bağırov, N.Mursakulov, bu günə kimi bilmirsiniz ki, hər bir idman növündə ildə bir dəfə Azərbaycan çempionatı keçirilir, xalqa niyə yalan məlumatlar çatdırırsınız? Dağçılıq idmanı deməklə, dağçılığa aid olan bütün idman növlərini bir qələmə verirsiniz – çox təəssüf.
Bunu da bilməlisiniz ki, piyada turizmi ilə alpinizm idman növləri ayrı-ayrı şeylərdir. V.Bağırov və N.Mursakulov, siz piyada turizminə mənsub olan və idman dərəcəsi olan adamlarsınız. V.Bağırov, siz hansı idman növündən idman ustalığına namizədsiniz? Sizin əməkdar məşqçi adını almağınızdan mənim xəbərim var: sizin təsnifat əsasında heç bir normativ yerinə yetirilməyib, siz bu adı havadarnızın imzası vasitəsi ilə alıbsınız - bunu hamı təsdiq edə bilər. İndi də ona qulluq edirsiniz. Bizləri utanmamaqda (?) ittiham edirsiniz, ancaq əslində utanmalı sizsiniz!
Əgər alpinizmdən xəbəriniz varsa, bir dağ adı çəkin ki, onu fəth edibsiniz. Ayıbdır Sizin üçün, əməkdar müəllim! Nizami M.-ovla birlikdə mənə qara yaxmağınız haradan qaynaqlanır – bunu mən bilirəm, ancaq məntiqiniz olsaydı... Axı biz bir-birimizi 40 ildən çoxdur ki, tanıyırıq, o zamanlar siz bir “mahnı oxuyurdunuz” indi isə başqa.
Nizami, sən neçə illərdir bir qohum və idmançı kimi mənim yanımda olmusan, bütün tədbirlərimizdə iştirak etmisən. Səni dağlara mən aparmışam. Axı sən də 1998-ci ildə ilk dəfə “Heydər zirvəsi”nin fəthində öz komandan ilə iştirak etmisən. Mənə necə nahaq irad tutursan ki, guya mən Alpinizm Federasiyasının əmlakını dağıtmışam, satıb satıb qurtarmışam?! Sən və siz yaxşı bilirsiniz ki, federasiyanın heç bir əmlakı olmayıb, hər hansı bir tədbirə ayırılan vəsaitdən isə sən də “nuş etmisən”. Mənim adıma ləkə salmaq cəhdinə görə sən ar olsun! Sən özünü təmiz adam kimi qələmə verirsən. Məgər XDMX-də işlədiyin zaman pulu keçirib, sonra da faizi alan sən deyildinmi? Yoxsa yadından çıxıb?! Öz bəd əməllərini başqasının adına yazmaq və ictimaiyyətə yalan demək sənin birinci işin deyil – bunu qohum-əqrəba yaxşı bilir.
İlqar İsrafilova gəldikdə, ona deməyə söz tapmıram. Onu təmiz, düzə düz, yalana yalan deyən bir insan kimi tanımışdım. Mənə qarşı belə hərəkət etməyini heç cür başa düşmürəm. Nə isə, özü bilər. Ancaq o niyə yadından çıxarıb ki, 1997-ci ildə Qusarda klub yaradarkən, ona təmənnasız olaraq 30 komplekt (çadır, dağ ayaqqabısı, yatacaq, xilas etmə kəməri, iplər, çanta) verdim. Onun havadarları da bilir ki, Qusarın idmançıları həmin ləvazimatlardan istifadə edirlər. Bəs FAİREX sizə nə verib? Ayıb olsun!
Qara yaxan, yalan danışan, alpinizimdən bixəbər olanlar indi kimlərinsə çaldığı hava ilə oynayırlar. Ancaq vaxt gələcək, ədalət öz yerini tapacaq. Onda bu insanlar necə üzümüzə baxacaqlar? Əlbəttə, belə insanların qanındadır ki, hər gün dəyişib başqa adam olsunlar. Heç şübhə etmirəm ki, bunlar sabah yenə də öz şirin dillərini işə salacaqlar. Necə ki indi: soruşuruq bu nə bəyanatdır imza atmısınız? Cavab verirlər ki, “bəyanatın məzmunundan xəbərimiz yoxdur, zəng edib deyiblər sizin adınızı yazmışıq...” Və üstəlik deyirlər ki, “sizə deyirik ha, amma xahiş edirik açıb-ağartmayın, bilirsiniz bu məsələ haradan qaynaqlanır, bizim adımız olmasın...”
Daha sözüm yoxdur. “Cənablar”, əgər doğrudan da siz deyən kimidirsə, onda sabah sizdən başqa şey tələb edəcəklər, siz isə qorxudan hər şeyə razı olacaqsınız.
Qoy indi ictimaiyyət bilsin ki, maddiyyat naminə, xəstə ambisiyalar naminə, müxtəlif qüvvələrin təsiri ilə kimlər nəyə xidmət edir.
Söz istəyirəm
-
Gəncə şəhərində ünvanlı sosial yardımın təyinatı ilə bağlı yubanmalar yarandığı deyilir. Gəncə şəhərində yaşayan Hacıyev Vüqar Turana bildirib ki, artıq bir aydan çoxdur ki, ünvanlı dövət sosial yardım üçün Dövlət Sosial Müdafiə Fondunun Gəncə vahid əlaqələndirmə mərkəzinə müraciət etsə də, ona nə müsbət cavab, nə də imtina cavabı verilmir: "Əlaqəndirmə mərkəzinə zəng vurub soruşanda deyirlər ki, VEMTAS sistemi işləmir deyə, müraciətlərə baxılması və cavabların verilməsi mümkün deyil. Bir aydan çoxdur ki, Gəncədən müraciət edən adamlar konkret cavab ala bilmir".
-
Çin hökümətinin başlatdığı Bir yol, bir kəmər layihəsi Çinin müasir tarixinin əsas uğuruna çevrilib. Çin Xalq Respublikasının təşəbbüskarı olan layihəyə tərəfdaş ölkələrdəki fəaliyyəti yalnız ikitərəfli iqtisadi yüksəlişlə məhdudlaşmır, həmçinin Bir yol, bir kəmər-ə üzv olan dövlətlərdə Çinin xarici siyaəstinə dəstəkdir. Əlavə olaraq layihədə üzvlüyü olan ölkələr Çin üçün mühüm təbii resurs mənbəyidir. Azərbaycan da Çinin rəhbərlik etdiyi Bir yol, bir kəmər layihəsinin iştirakçılarından biri olaraq ikitərəfli münasibətlərin tərəqqisində mühüm rol oynayır. Belə ki, Rusiya-Ukrayna müharibəsinin başlanması ilə Rusiya ərazisinin Qərbə çıxışının bağlanmasından sonra Trans-Xəzər Beynəlxalq Nəqliyyat yolu Azərbaycanı əsas ticarət marşurut xətti edib. Həmçinin yaranan şərait qeyri-neft sektorun artırmaq və İkinci Qarabağ Müharibəsindən sonra xarici investisiyanın ölkəyə axınını planlaşdıran Azərbaycan üçün xeyirli nəticələnə bilər. Lakin, Çinlə münasibətlərdəki yalnış siyasət bir çox mənfi təsirlər də vəd edir.
-
İki il əvvəl Biləsuvar Rayon İcra Hakimiyyətinin və Əmək və Əhalinin Sosial Müdafiəsi Nazirliyinin nümayəndələri Birinci Qarabağ müharibəsinin qəhrəmanı, şəhid Şaiq Kəlbiyevin evinə gəliblər və hakimiyyətin bu ailə üçün yeni ev tikmək niyyətində olduğunu bildiriblər.
-
Dəyərli media mənsublarını, peşəkar və vicdanlı jurnalistləri məhbəsdən salamlayıram.
Rəy yaz