Azərbaycanla İran arasında sazişlər imzalanıb (YENİLƏNİB)

Aprelin 9-da Tehranda prezident İlham Əliyevin rəsmi səfəri çərçivəsində iki ölkə nümayəndə heyətlərinin iştirakı ilə prezidentlərin görüşü keçirilib. Görüşdən sonra hidrometrologiya, idman, fövqəladə halların nəticələrinin aradan qaldırılması sahələrində  hökumətlərarası sənədlər imzalanıb.

Sonra prezidentlər Həsən Ruhani və İlham Əliyev brifinq keçiriblər.-16D-

2014 Aprel 09 (Çərşənbə) 11:19:23

Aprelin 9-da prezident İlham Əliyev İrana rəsmi səfərə gedib.

İran KİV-in məlumatına görə, hava limanında İ.Əliyevi İranın rabitə naziri Mahmud Vaezi qarşılayıb.

Səfər İran prezidenti Həsən Ruhaninin dəvətilə baş tutub. İki prezidentin görüşü zamanı qarşılıqlı maraq doğuran məsələlər, həmçinin regional və beynəlxalq problemlər müzakirə olunacaq. Səfər çərçivəsində ticarət və iqtisadi əməkdaşlıq haqqında sazişlərin imzalanacağı gözlənilir. Bundan əlavə, dövlət başçıları bəyanatla çıxış edəcəklər.

Qeyd edək ki,son vaxtlar ikitərəfli əlaqələr canlandırılıb. Belə ki, martın 14-də Van şəhərində Azərbaycan və İranın XİN rəhbərləri Elmar Məmmədyarov ilə Cavad Zərifin görüşü olub. Onlar ikitərəfli əməkdaşlığın genişləndirilməsi məsələsini müzakirə ediblər. Həmçinin Xəzərin hüquqi statusunun hazırlanmasına dair fikir mübadiləsi aparılıb.

Bir neçə gün sonra prezident İlham Əliyev İranın xarici işlər nazirinin müavini, Xəzər məsələləri üzrə xüsusi nümayəndə İbrahim Rəhimpuru qəbul edib. Görüş zamanı İ.Əliyev deyib ki, onun Davosda prezident H.Ruhani ilə görüşü ikitərəfli münasibətlərə yeni təkan verib.

Martın 14-də FHN rəhbəri Kəmaləddin Heydərov İrana rəsmi səfər edib və prezident H.Ruhani ilə görüşüb. Səfər çərçivəsində o, İranın sənaye və ticarət naziri Mühəmmədrza Neymətzadə, hasilat sənayesinin inkişafı üzrə təşkilatın sədri Mehdi Kerbasian, daxili işlər nazirinin müavini İsmayıl Neççar və digər rəsmi şəxslərlə görüşüb. Danışıqlar zamanı gələcək əməkdaşlıq perspektivləri, iki ölkə arasında mövcud əlaqələrin inkişafı müzakirə olunub. -16B-