Bakı Ermənistanın məntiqli qüvvələri ilə danışıqlara hazırdır

Bakı/24.04.18/Turan: Bakıda Serj Sarkisyanın hərbi diktatura rejimi getdikdən sonra Ermənistanda rəhbərliyə sağlam qüvvələrin gələcəyinə, Qarabağ münaqişəsinin nizamlanması məsələsində onların konstruktiv mövqe tutacağına ümid edirlər. Bu barədə bu gün Azərbaycan XİN-in rəsmi nümayəndəsi Hikmət Hacıyev Ermənistanda hakimiyyət dəyişikliyinin Ermənistan-Azərbaycan münaqişəsinin nizamlanmasına təsiri məsələsini şərh edərkən bildirib.

Bu zaman o qeyd edib ki, Yerevanın son günlər Azərbaycan hərbi texnikasının və canlı qüvvəsinin cəbhə xəttində cəmlənməsi haqqında verdiyi "isteriyalı bəyanatlar" həqiqəti əks etdirmir.

"Əsas məqsəd cəmiyyəti yanıltmaqdır, amma erməni qoşunlarının Azərbaycanın işğal edilmiş ərazilərində olması əvvəlki kimi regionda sülh və sabitliyi təhlükə altına qoyur. Gərginliyi aradan qaldırmaq üçün erməni qoşunları Azərbaycanın işğal edilmiş ərazilərini tərk etməlidir", deyə Hacıyev bildirib.

Onun sözlərinə görə, Azərbaycan Ermənistanın sağlam düşüncəli siyasi qüvvələri ilə Qarabağ münaqişəsinin beynəlxalq hüquq norma və prinsipləri və BMT Təhlükəsizlik Şurasının müvafiq qətnamələri əsasında sülh yolu ilə və ən qısa zamanda həlli haqqında danışıqları davam etdirməyə hazırdır.

Yalnız münaqişənin sülh yolu ilə həlli regionda möhkəm sülh və sabitliyi təmin edəcək, regional əməkdaşlıq üçün hərtərəfli imkanlar yaradacaq, deyə Hacıyev qeyd edib. -06D-