Bakı fələstinli səfirlərin toplantısına ev sahibliyi edib

Bakı/05.11.18/Turan: Azərbaycan "Fələstin Dövlətinin Asiya ölkələrindəki Səfirlərinin Konfransı"na ev sahibliyi edib.

Xarici İşlər Nazirliyinin bu gün, noyabrın 5-də yaydığı məlumata görə, tədbirdə Fələstinin xarici işlər naziri Riad Maliki, xarici işlər nazirinin Asiya, Afrika və Avstraliya məsələləri üzrə müavini Mazen Şamiyah, Fələstin Milli Fondunun rəhbəri-Nazir Mouin Elias Yousef Khouri iştirak edib. Onlardan başqa Fələstinin Asiya ölkələrində akkreditə olmuş 27 səfiri də konfransda iştirak üçün Azərbaycana gəliblər.

Konfransın açılışında xarici işlər naziri Elmar Məmmədyarov çıxış edib. O, Azərbaycanın tədbirə ev sahibliyi etməkdən məmnun olduğunu bildirib. Nazir Azərbaycanın Fələstin məsələsinin, Şərqi Qüdsün Fələstin Dövlətinin paytaxtı olmaqla, iki dövlət həllini davamlı olaraq dəstəklədiyni ifadə edib.

Tədbirdə Azərbaycanın Fələstin xalqının çətin günlərində hər zaman yanında olduğu və islam həmrəyliyinə sadiq qaldığı vurğulanıb. Qeyd edilib ki, Azərbaycan BMT-nin Fələstinli Qaçqınlara Yardım və İşlərin Təşkili üzrə Yaxın Şərq Agentliyinə oktyabrda 200 min dollar yardım edib.

Tədbir iştirakçılarına Dağlıq Qarabağ münaqişəsindən danışan Elmar Məmmədyarov həmçinin Azərbaycanın İslam Əməkdaşlıq Təşkilatı çərçivəsində fəaliyyəti haqqında da məlumat verib.

Fələstinin xarici işlər naziri Riad Maliki Fələstin xalqının sülh uğrunda mübarizəsində göstərdiyi davamlı dəstəyə görə Azərbaycan tərəfinə təşəkkürünü ifadə edib.

İsrail-Fələstin problemi 1948-ci ildən başlamaqla müasir dünyanın ən "uzunömürlü" münaqişələrindən biri sayılır. Bu münaqişə bir neçə dönəmlərdə müharibə ilə müşahidə edilib. Qüds (Yerusəlim) şəhərinə hər iki tərəf iddia edir. Hazırda şəhər İsrailin nəzarətindədir.

BMT Təhlükəsizlik Şurası bu münaqişənin həlli məqsədilə çoxsaylı qətnamələr qəbul etsə də, tərəflər onlara əməl etməyiblər.--0--