Bakı İran rəhbərliyinin Qarabağa dair bəyanatını yüksək qiymətləndirib

Bakı/04.11.20/Turan:  Azərbaycan XİN İran İslam Respublikasının ali rəhbəri ayətullah Seyyid Əli Xameneinin Ermənistan-Azərbaycan münaqişəsilə bağlı açıqlamasını və Azərbaycanın ərazi bütövlüyünə verilən dəstəyi yüksək qiymətləndirir. 

“Azərbaycanın Ermənistan tərəfindən işğal olunmuş ərazilərinin hamısı azad olunmalıdır və bütün bu ərazilər Azərbaycana qaytarılmalıdır” deyən ali rəhbər Azərbaycanın beynəlxalq hüquqa əsaslanan haqq mövqeyinə İran İslam Respublikasının qəti dəstəyini növbəti dəfə bəyan edib.

Dost İran dövlətinin Ermənistan-Azərbaycan münaqişəsinin həlli istiqamətində səylərini, o cümlədən İran İslam Respublikası prezidentinin xüsusi elçisi, xarici işlər nazirinin müavini Seyid Abbas Əraqçinin bölgəyə səfəri və münaqişənin tezliklə həllinə dair təşəbbüslə çıxış etməsini yüksək dəyərləndiririk”, - Azərbaycan XİN mətbuat xidmətinin məlumatında deyilir.

Bakı inanır ki, “ölkələrimiz arasında tarixi köklər üzərində qurulmuş əlaqələr gələcəkdə də uğurla inkişaf edəcək və bu əlaqələr, o cümlədən bölgədə sülh, sabitlik və rifahın təmin olunmasına xidmət edəcək”.06В-