Bakı yaxınlığından raket atışı

Dünən Rusiyanın Xəzər donanmasının dörd gəmisi Xəzər hövzəsindən Suriyaya raket atışlarını bərpa edib.

Oktyabrın 7-də ilk buraxılışlardan fərqli olaraq, bu dəfə Rusiya komandanlığı raketlərin məhz haradan buraxıldığını bildirməyib. Həmin vaxt Rusiya HDD-nin dörd gəmisi dənizin Azərbaycan sektorundan keçərək İran sahilləri yaxınlığında dayanıb və oradan zərbə endirib. Bu, sərhədlərinin bilavasitə yaxınlığından qanadlı raket buraxılmasına heç bir reaksiya verməyən Azərbaycandan başqa, bir çox ölkədə səs-küyə və ciddi narahatçılığa səbəb olub.

Rusiya KİV-lərinin ikinci raket buraxılışı ilə bağlı məlumatında bu dəfə Suriyadakı hədəflərə zərbələrin Xəzər hövzəsindən uzaq aviasiyanın endirdiyi barədə mühüm məqam var.

Müdafiə naziri Şoyqunun sözlərinə görə, Tu-160 və Tu-95MC strateji bombardman təyyarələri Aleppo və İdlibedəki hədəflərə 34 qanadlı raket buraxıb. Bu o deməkdir ki, Rusiya aviasiyası Azərbaycanın quru sərhədlərinin bilavasitə yaxınlığında və dənizin Azərbaycan sektoru üzərindən uçub.

RF hakimiyyəti dəfələrlə bildiriblər ki, öz addımlarını region ölkələri və öz tərəfdaşları ilə razılaşdırıblar. Onların məhz kimi nəzərdə tutduğu açıqlanmır.

Bakının Rusiya HHQ və HDD-nin öz sahilləri yaxınlığında bu hərəkətlərinə razılıq verdiyini təxmin etmək çətin deyil. Bütün məsələ ondadır ki, nə üçün və ya nəyin müqabilində? Daha dəqiq olsaq isə, söhbət Azərbaycanın suverenliyinin pozulmasından gedir, çünki ölkə Konstitusiyasına əsasən, Xəzərin Azərbaycan sektoru ölkənin ərazisidir.

Siyasi-hüquqi nöqteyi-nəzərdən bu cür addımlar dəfələrlə Xəzərin sülh dənizi olduğu və burada hər-hansı hərbi fəallığın yolverilməz olduğunu bəyan edən Rusiya və İran hakimiyyətinin arsızlığına dəlalət edir. -02В-